Lotereıany zańsyz uıymdastyrǵandarǵa qatań sharalar qoldanylmaq
Bul týraly búgin zań jobalaý qyzmeti máseleleri jónindegi vedomstvoaralyq komıssııanyń kezekti otyrysy barysynda QR Mádenıet jáne sport mınıstrliginiń jaýapty hatshysy Qýatjan Ýálıev málim etti, dep habarlaıdy QazAqparat.
«Qylmystyq kodekske lotereıa qyzmetin zańsyz uıymdastyrǵany úshin jaýapkershilikti engizý usynylyp otyr. 2016 jyldyń qarashasynan bastap lotereıa operatory bolyp tabylmaıtyndarǵa lotereıalyq qyzmetti iske asyrýǵa tyıym salyndy. Qazirgi ýaqytta lotereıa operatory anyqtaldy, alaıda keıbir alaqol kásipkerler osy qyzmetterin áli de doǵarmaı jatyr», - dep toqtaldy jaýapty hatshy «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasynyń tujyrymdamasyn qarastyrý barysynda.
Osy oraıda ol adamdar kóptep jınalatyn jerlerde lotereıa termınaldary burynǵysynsha ornalastyrylyp jatqandyǵyn sóz etti.
«Olar shyn máninde oıyn avtomattary bolyp tabylady, sebebi onda qumar oıyndaryna tán algorıtm baıqalady. Biraq tájirıbe júzinde organdarmen júrgizilgen tıisti saraptama termınaldardyń oıyn avtomattarymen uqsastyǵyn rastamaıdy. Bul óz kezeginde alaqol adamdarǵa jaýapkershilikten jaltarýǵa múmkindik beredi», - dep túsindirdi Ýálıev.
