Lotereıadan túsken paıdany áleýmettik salaǵa baǵyttaý qajet - A. Muhamedıuly

ASTANA. QazAqparat - Lotereıadan túsken paıda áleýmettik salaǵa baǵyttalatyn bıýdjettik shyǵyndardy edáýir qysqartady. Bul týraly búgin QR Parlamenti májilisinde «Lotereıa jáne lotereıalyq qyzmet máseleleri jónindegi QR zańyna ózgerister men tolyqtyrýlar týraly» zań jobasyn talqylaý barysynda QR Mádenıet jáne sport mınıstri Arystanbek Muhamedıuly málim etti.

«Lotereıadan túsken paıda mádenıet, sport, bilim berý, densaýlyq saqtaý jáne ózge de áleýmettik salaǵa baǵyttalatyn bıýdjettik shyǵyndardy edáýir qysqartýǵa múmkindik beredi. Mysaly, 2012 jyly London Olımpıadasyn uıymdastyrýǵa baǵyttalǵan qarjynyń 23 paıyzy osy lotereıa paıdasy esebinen tústi», - dedi mınıstr.

Onyń sózine qaraǵanda, zań jobasy boıynsha lotereıa operatorlaryna salyqtyq mindettemelermen qatar syıaqy qory men túsken paıdanyń aıyrmashylyǵynan 10 paıyz paıdany respýblıkalyq bıýdjetke lotereıalyq tólemder jasap otyrýy tıis.

«Qazirgi ýaqytta biz de, salyqtyq organdar da, syıaqy qoryna paıdanyń qansha úlesi baǵyttalatyndyǵyn bile almaımyz. Bul zańda biz naqty jazdyq, paıdanyń 50 paıyzy syıaqy qoryna túsýi tıis. ıAǵnı eger lotereıa 100 teńge turatyn bolsa, operator syıaqyǵa onyń 50 teńgesin jumsaýy kerek. Eń bastysy operator tabysynyń 10 paıyzyn respýblıkalyq bıýdjetke áleýmettik jobalarǵa baǵyttaýǵa mindetteımiz. 20 paıyzyn salyqqa, 20 paıyzyn shyǵyndaryn óteýge jumsasyn», - dedi A. Muhamedıuly.