Lotereıa oıyndarynan túsken qarajat buqaralyq sportty damytýǵa baǵyttalatyn bolady
ASTANA. 28 qazan. QazAqparat - Búgin Parlament Májilisinde «Lotereıalar jáne lotereıalar qyzmeti týraly» jáne «Qazaqstan Respýblıkasynyń keıbir zańnamalyq aktilerine lotereıa jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobalarynyń tanystyrylymy bolyp ótti.
Zań jobasy lotereıa qyzmetterin uıymdastyrý men ótkizýge qoıylatyn quqyqtyq-ekonomıkalyq jáne áleýmettik, ýaqyt talaptaryna sáıkestik talaptaryn anyqtaý, sondaı-aq naryq sýbektilerine teń talaptar qurý maqsatynda ázirlengen. «Qujat arqyly lotereıa qyzmetine Úkimettiń quzyreti men ýákiletti organdy belgileý kózdeledi. Lotereıa bir sáttik, tırajdyq jáne bıngo dep bólinetin bolady. Zań jobasyndaǵy mańyzdy elementterdiń biri lotereıa qyzmetin júzege asyrýdyń áleýmettik baǵdaryn aıqyndaýǵa arnalady. Bul úshin ulttyq lotereıa operatory engiziledi. Sonymen qatar, lotereıa qyzmetinen túsken tabys elimizdegi buqaralyq sportty, onyń ishinde balalar sportyn damytýǵa, óńirlerde sporttyq ınfraqurylymdardy damytýǵa baǵyttalady», - dedi Sport jáne dene shynyqtyrý agenttiginiń tóraǵasy Erlan Qojaǵapanov.
Onyń aıtýynsha, zań jobasy arqyly usynylyp otyrǵan tetikter elimizdegi lotereıaǵa qatysatyn azamattar qatarynyń yntasyn arttyra túsedi.
Eske sala keteıik, zań jobasy Parlamenttiń buǵan deıingi sessııasyna túsip, keıinnen Májilis ony Úkimetke qaıtarǵan edi.
