Lotereıa qyzmetine qatysty zań jobasy boıynsha qurylǵan jumys tobynyń jetekshisi taǵaıyndaldy
ASTANA. 29 qazan. QazAqparat - Ekonomıkalyq reforma jáne óńirlik damý komıtetiniń sheshimimen «Lotereıalar jáne lotereıa qyzmeti týraly» zań jobasy boıynsha qurylǵan jumys tobynyń jetekshisi bolyp Parlament Májilisiniń depýtaty Serik Seıdýmanov taǵaıyndaldy. Bul jóninde Ekonomıkalyq reforma jáne óńirlik damý komıtetiniń tóraǵasy Seıitsultan Áıimbetov málimdedi.
Sonymen qatar osy jumys tobynyń qaraýyna «Qazaqstan Respýblıkasynyń keıbir zańnamalyq aktilerine lotereıa jáne lotereıa qyzmeti máseleleri boıynsha ózgerister men tolyqtyrýlar engizý týraly» ilespe zań jobasy da berilip otyr. Seıitsultan Áıimbetov: «Bul zań jobalary lotereıa qyzmetin tıimdi memlekettik retteýdi qamtamasyz etýge, osy qyzmet túrine memlekettik organnyń quzyretin bekitýge, jeke sýbektiler qyzmetin júzege asyrýy úshin quqyqtyq negizderdi belgileý men olardyń memlekettik organdarmen naqty ózara is-áreketterin kamtamasyz etýge baǵyttalǵan»,- dedi. Aıta ketý kerek, 28 qazan kúni Májilistiń Ekonomıkalyq reforma jáne óńirlik damý komıtetiniń uıymdastyrýymen atalǵan zań jobalarynyń tanystyrylymy bolyp ótti. Zań jobalary boıynsha QR Sport jáne dene shynyqtyrý agenttiginiń tóraǵasy Erlan Qojaǵapanov baıandama jasady.
