Lotereıa qyzmetin retteıtin zań maquldandy
NUR-SULTAN. QazAqparat - QR Parlamenti Májilisi «QR-nyń keıbir zańnamalyq aktilerine lotereıalar jáne lotereıa qyzmetiniń máseleleri boıynsha ózgerister men tolyqtyrýlar engizý týraly» zań jobasyn maquldady, dep habarlaıdy QazAqparat tilshisi.
Atalǵan qujat boıynsha baıandama jasaǵan Ekonomıkalyq reforma jáne óńirlik damý komıtetiniń múshesi Álııa Saparovanyń aıtýynsha, zań jobasy 2020 jyldyń 5 aqpanda Májilistiń jalpy otyrysynda birinshi oqylymda maquldanǵan. Zań jobasymen 1 kodekske, 2 zańǵa ózgerister men tolyqtyrý engiziledi.
«Zań jobasyn birinshi oqylymda Parlament Májilisiniń jalpy otyrysynda talqylaý barysynda, Májilis tóraǵasynyń tapsyrmasy boıynsha ekinshi oqylymǵa daıyndaý barysynda depýtattar «QR-nyń Ákimshilik quqyq buzýshylyq týraly» kodeksine lotereıa operatory bolyp tabylmaıtyn tulǵanyń lotereıa ótkizgeni úshin birinshi ákimshilik quqyq buzýshylyq kezinde aıyppul túrindegi jaýaptylyqty engizý boıynsha jáne «Jarnama týraly» Zańǵa lotereıa operatory jáne lotereıa operatorymen shart aıasynda lotereıa taratýshylar ornalastyratyn jarnamany qospaǵanda lotereıa jarnamasyna tyıym salý jóninde túzetý engizildi. Budan basqa lotereıa ótkizýdiń ashyqtyǵyn jáne barynsha aıshyqtyǵyn qamtamasyz etý maqsatynda «Lotereıalar jáne lotereıa qyzmeti týraly» Zańǵa tırajdyq kommısııanyń jáne lotereıa taratýshynyń agentiniń mindetterin kózdeıtin túzetýler engizildi», - dedi Májilis depýtaty.
Sondaı-aq, onyń aıtýynsha, depýtattar zań jobasynyń jekelegen normalaryn naqtylaıtyn jáne onyń mazmunyn jaqsartatyn túzetý qosyp otyr. Jumys tobyna 60 túzetý kelip túsken.
Májilis depýtattar zań jobasyn maquldap, Senat qaraýyna jiberdi.
