Los-Anjelestegi ataqty «Gollıvýd» jazýy ornynda qalatyn boldy
ASTANA. Sáýirdiń 27-si. QazAqparat - Los-Anjelestegi Maýnt-Lı tóbesinde ornalasqan ataqty «Gollıvýd» degen jazýdy saqtap qalý naýqany óziniń ıgi maqsatyna jetti.
«Trast for pablık lend" qoǵamdyq uıymy málim etkendeı, metsenattardyń, gollıvýdtyq stýdııalardyń, rejısserler men akterlerdiń, jergilikti turǵyndardyń erikti jarnalarynyń arqasynda 12,5 mıllıon dollar qarjy jınalyp otyr. Megapolıstiń sımvolyna aınalǵan ataqty jazýdy aman alyp qalyp, ornyna qurylys jumystaryn júrgizýge jol bermes úshin osynshama soma qajet bolǵan edi, dep habarlaıdy ITAR-TASS agenttigi.
Los-Anjeles sımvoly sonaý 1923 jyly turǵyzylǵan bolatyn. Ol kezde jazý qazirgideı 9 latyn árpinen emes, 13 áripten turatyn jáne Hollywoodland degen jazý - jer telimderin jarnamalaıtyn. 1949 jyly Gollıvýd Saýda palatasy sońǵy tórt áripti alyp tastap, qalǵan áripterdi jóndeýden ótkizedi. Al 1978 jyldyń qarasha aıynda tóbege bıiktigi 13 metrge jetetin jańa áripter ornatylady. Ol áripterdiń árqaısysy 27,5 myń dollarǵa túsken. Al sózdiń jalpy uzyndyǵy - 150 metrdi quraıdy.
