Los-Andjelestegi eń joıqyn orman órtine kináli bolýy múmkin kúdikti qamaýǵa alyndy

ASTANA. KAZINFORM – AQSh bıligi 29 jastaǵy er adamǵa Kalıfornııadaǵy joıqyn orman órtin týdyrdy dep aıyp taqty, dep habarlaıdy 1news. 

Federaldy sheneýnikterdiń aıtýynsha, Djonatan Rınderkneht jańa jyldyń alǵashqy kúni shaǵyn ot jaqty. Ol áýeli jer astynda byqsyp janyp, bir aptadan keıin qaıtadan tutanyp, Los-Andjelestiń kóptegen dáýletti jáne ataqty adamdary turatyn Pasıfık-Palıseıds tóńiregin sharpydy.

7 qańtarda bastalǵan órt Pasıfık-Palıseıds pen Malıbý aýdandarynda 12 adamnyń ómirin qıyp, Los-Andjeles okrýgindegi 17 myńnan astam úı men ǵımarattardy qıratty.

Rınderkneht sársenbide Florıdada qamaýǵa alyndy jáne beısenbide Orlandoda sot aldynda kem degende 5 jyl bas bostandyǵynan aıyrýdy qarastyratyn múlikti órteý arqyly qasaqana joıý degen aıyppen alǵash ret jaýapqa tartyldy.

Sottalýshy federaldy sýdıaǵa onyń esirtki qabyldamaǵanyn jáne psıhıkalyq densaýlyǵyna qatysty problemalary joq ekenin aıtty. Sýdıa sot otyrysyn 17 qazanǵa belgiledi.

Tergeýshilerdiń habarlaýynsha, Rınderkneht 2024 jylǵy Jańa jyl merekesi qarsańynda Uber-de júrgizýshi bolyp jumys istegen. Pasıfık-Palıseıdste jolaýshyny túsirgennen keıin ol kólikti toqtatyp, soqpaq jolmen jaıaý júrgen. Prokýrorlardyń aıtýynsha, ol jaqyn mańdaǵy tóbeden beıne túsirip, zattardy órtep jatqan adamdar beınelengen rep ánin tyńdaǵan. Tún ortasynan keıin ot jaqty.

Eske salsaq, qańtar aıynda Kalıfornııa bıligi Los-Andjeleste qalanyń batysyndaǵy keıbir aýmaqtardy sharpyǵan orman órtine baılanysty tótenshe jaǵdaı jarııalady. Turǵyndarǵa evakýatsııalaý týraly buıryq berildi.