Los-Andjeleste Grammy syılyǵynyń ıegerleri marapattaldy
ASTANA. QazAqparat - Los-Andjelestegi «Stepls» sporttyq-kóńil kóterý kesheninde ótken mýzyka álemindegi asa bedeldi Grammy Awards syılyǵynyń 56-shy ret tapsyrylý saltanatyna tanymal óner juldyzdary qatysty, dep habarlaıdy "RIA Novostı".
Kesh qonaqtarynyń biri Madonna munda óziniń uly Devıdpen birge keldi. Sondaı-aq áıgili qyzyl kilemniń ústimen Djon Ledjend, Shennon Maklemor, Beıonse, Arıana Grande men Raıan Lıýıs syndy tanymal juldyzdar júrip ótti. Aıtýly saltanattan Robın Tık, Kıt Ýrban, Perıs Hılton, Sara Barellıs, Mark Entonı de tys qalmady.
On jeti jasar jańazelandııalyq qyz Lordtyń oryndaýyndaǵy Royals áni 2013 jyldyń eń úzdik kompozıtsııasy dep tanyldy. Ol sonymen qatar «Eń úzdik solo ánshi» marapatyn da ıelendi. Onyń ótken jyldyń qyrkúıek aıynda shyqqan debıýttik Pure Heroine albomy «Tanymal mýzyka janryndaǵy eń úzdik albom» nomınatsııasyn ıelendi.
«Jyldyń eń úzdik dýeti» jáne «Jyldyń eń úzdik albomy» nomınatsııalary boıynsha frantsýzdyq Daft Punk toby tabysqa jetti. Kópshiliktiń súıispenshiligine onyń «Random Access Memories» atty albomy bólendi. Dál osy albom sál burynyraq «Jyldyń eń úzdik bı/elektrondy albomy» marapatyna ıe bolǵan edi.
Eń úzdik mýzykalyq beıneklıpteri úshin «Gremmıdi» Djastın Tımberleık pen Jay Z oryndaýyndaǵy Suit & Tie kompozıtsııasy ıelendi.
«Gremmıge» alty sanat boıynsha óz týyndylaryn usynǵan Macklemore & Ryan Lewis tandemi «Jyldyń eń úzdik jańa oryndaýshysy» syılyǵyn aldy.
«Eń úzdik rok-kompozıtsııa» nomınatsııasynda Cut Me Some Slack týyndysy úshin Pol Makkartnı jeńis tuǵyrynan kórindi. Ol sondaı-aq The Beatles tobyndaǵy áriptesi Rıngo Starrmen birge mýzyka ındýstrııasyna erekshe úles qosqandary jáne tabystarǵa qol jetkizgenderi úshin taǵy bir «Gremmıdi» enshiledi.
Bul syılyq AQSh-tyń Dybys jazý akademııasymen jyl qorytyndysy boıynsha óner salasyna eńbek sińirgen tulǵalarǵa mýzyka salasyndaǵy jetistikteri úshin beriledi. Ony ánshiler, sazgerler, dybys jazý ınjenerleri, saz árleýshileri, dırıjerler men mýzykalyq toptardyń jetekshileri ıelene alady.
