Los-Andjeleste 10 adamdy óltirgen kúdikti ózin atyp tastady
ASTANA.QazAqparat - Los-Andjeleste 10 adamdy atyp óltirdi degen kúdikti kórshi Algambra qalasynda polıtsııa tosqaýyl qoıǵan júk kóliginde ózin atyp tastady, dep habarlaıdy QazAqparat BBC jańalyqtaryna silteme jasap.
Kalıfornııanyń Montereı-Park qalasyndaǵy kásiporyndardyń birinde atys bolyp, on adam qaza tapty. Bul qylmysqa kúdikti oqıǵa ornynan qashyp, kóp uzamaı ózin-ózi atyp óltirdi.
Los-Andjeles okrýginiń sherıfi Robert Lýna jýrnalısterge júk kóligi qorshaýǵa alynǵan kezde polıtsııa oq atylǵanyn estigenin aıtty. Bir jarym saǵattan keıin olar kólikke kirip, kúdiktiniń denesin tapty.
Polıtsııa ózin-ózi atyp óltirgen kúdiktiniń 72 jastaǵy azııalyq, jergilikti turǵyn Hý Tsan Tran ekenin anyqtady. Los-Andjeles Qytaı Saýda palatasynyń basshysy Chester Chon jergilikti telearnanyń efırinde jappaı adamdar qyrylǵan bul oqıǵaǵa kúdikti men onyń áıeli arasyndaǵy janjal túrtki bolǵanyn aıtty.
Qaza tapqan on adamnan bólek, taǵy on adam jaralanǵan. Olardyń jeteýi jeksenbi kúni keshke aýrýhanaǵa jatqyzyldy.
Osyǵan deıin Los-Andjeleste qytaı jańa jylyn merekeleý kezinde atys bolǵany týraly jazǵan edik.
Foto: EPA