Los-Andjeles Olımpıadasynda bokstan altyn alý úshin bárin jasaımyz - Shahmurat Mútálip

ASTANA. KAZINFORM – Los-Andjeles Olımpıadasynda boksshylarymyz altyn alatyn deńgeıge jetýi úshin barlyq jaǵdaı jasalady. Bul týraly «Jibek Joly» telearnasynyń «Ýáde» baǵdarlamasyna suhbat bergen Qazaqstan Boks federatsııasynyń prezıdenti Shahmurat Mútálip aıtty.

- Bizde talantty jastar óte kóp, bokstyń áleýeti zor. Óz tarapymnan altyn bolady dep ýáde bermeı-aq qoıaıyn. Biraq, altyn alatyn deńgeıge jetýi úshin barlyq jaǵdaı jasap, boksshylarymyzdy daıyndap aparamyz dep ýáde beremin. Ol jerde «baq shaba ma, bap shaba ma», endi ol tek daıyndyqqa baılanysty emes. Túrli sebebi bolady, - dedi QBF prezıdenti suhbat barysynda 2028 jyly Los-Andjeleste ótetin Olımpıada oıyndarynda boksshylarymyzdyń altyn alý múmkindigine qatysty saýalǵa oraı.

Sonymen qatar ol buǵan deıingi Olımpıada oıyndary aıasynda ótken boks kezdesýlerde Qazaqstan tóreshileri tórelik etip kele jatqanyn aıtty.

- Sońǵy Olımpıadany alatyn bolsaq, Qazaqstannan 3 tóreshiden bardy. Bul Qazaqstanǵa degen halyqaralyq uıymdardyń joǵary senimin kórsetedi. Búginde Olımpıadada tórelik ete alatyn qatelespesem, 3 juldyzdy 55 tóreshi bar. Parıj Olımpıadasynyń aldynda 38 tóreshi bolǵan. Búginde bul baǵytta da jumys istep, tóreshilerdiń biliktiligin arttyrdyq. Semınarlarǵa qatystyrdyq. Sondyqtan olardyń da sany artyp keledi, - dedi Shahmurat Mútálip.

Aıta keteıik, Anglııadaǵy dúbirli dodada Qazaqstan quramasy 7 altyn, 1 kúmis jáne 2 qola medal jeńip alyp, jalpykomandalyq esepte birinshi orynǵa ıe bolǵan edi. 

Prezıdent bokstan Álem chempıonatynda top jarǵan boksshylardy quttyqtady.