Los-Andjeles olımpıadasy: oıyndarǵa bıletti qalaı satyp alýǵa bolady
ASTANA. KAZINFORM — Los-Andjeleste ótetin 2028 jylǵy jazǵy Olımpıada oıyndarynyń bastalýyna eki jylǵa jeter-jetpes ýaqyt qaldy. Degenmen jankúıerler jarys bıletterin qazirdiń ózinde Olympic Hospitality paketteri arqyly satyp ala alady, dep habarlaıdy UOK baspasóz qyzmeti.
Keıinirek bıletterdi resmı qaıta satý platformasy arqyly rásimdeýge múmkindik beriledi.
Bıletterdiń resmı satylymy
2027 jyly uıymdastyrýshylar Los-Andjeles Olımpıadasynyń bıletterin resmı satylymǵa shyǵarady. Satylymnyń naqty bastalý kúni, satyp alý tártibi jáne qoljetimdi jarys sessalary týraly aqparat Olımpıadanyń resmı resýrstarynda jarııalanady.
Sol jyly AXS, Eventim, Ticketmaster jáne Sports Illustrated Tickets platformalary negizinde bıletterdi resmı qaıta satý qyzmeti iske qosylady. Onyń kómegimen jankúıerler paıdalanylmaǵan bıletterdi ózge ıelerinen qaýipsiz túrde satyp alyp, alaıaqtyq qaýpinen saqtana alady.
Olympic Hospitality
Qazirdiń ózinde jankúıerler arnaıy Olympic Hospitality baǵdarlamasy arqyly qyzmet kórsetý paketterine tapsyrys bere alady. Bron tapsyrys rásimdelgen boıda rastalady.
Bul paketter jarysqa kirý bıletimen qatar birqatar qosymsha qyzmetti qamtıdy. Atap aıtqanda, kórinisi qolaıly oryndar, eksklıýzıvti laýndjdar men jeke lojalarǵa kirý múmkindigi, meıramhana qyzmeti, sýsyndar, oıyn-saýyq baǵdarlamalary, sondaı-aq, qajet bolǵan jaǵdaıda qonaqúıge ornalastyrý nusqalary usynylady. Usynystarmen tanysyp, bron jasaý úshin hospitality.la28.org resmı portalyna kirýge bolady.
Baǵasy men shekteýler
Uıymdastyrý komıteti bılet baǵasynyń qoljetimdi deńgeıde saqtalatynyn málimdedi. Eń arzan bıletterdiń quny 28 AQSh dollarynan bastalady. Bıletterdiń shamamen jartysy 200 dollardan tómen, al 75 paıyzdan astamy 400 dollardan tómen baǵamen usynylady. Al ashylý jáne jabylý saltanattaryna arnalǵan eń qymbat bıletter premıým sanatyna jatady.
Satyp alýshylar úshin birqatar shekteý de qarastyrylǵan. Bir adam eń kóp degende 12 bıletke deıin satyp ala alady. Onyń ishinde ashylý jáne jabylý saltanattaryna jalpy lımıt aıasynda tórt bıletten artyq rásimdeýge bolmaıdy. Bılet platformalarynda 18 jasqa tolǵan azamattar ǵana tirkele alady. Sonymen qatar jasyna qaramastan, onyń ishinde kishkentaı balalar da árbir jarysqa jeke bıletpen kirýi tıis.
Eske sala keteıik, 2028 jylǵy jazǵy Olımpıada oıyndary 14-30 shilde aralyǵynda Los-Andjeleste ótedi.
Buǵan deıin Los-Andjeles-2028 Olımpıadasyna volonter qabyldaý bastalǵanyn jazdyq.
