Los-Andjeles meri AQSh bıligin qalany «tájirıbe alańy» etti dep aıyptady

ASTANA. KAZINFORM —  Los-Andjeles meri Karen Bass federaldy úkimettiń Ulttyq gvardııa men teńiz jaıaý áskerlerin tarta otyryp qalada tártipsizdikterge qarsy is-qımyl júrgizýin synady.

 Ol bul qadamdy «qalamyzdy tájirıbe alańy retinde paıdalaný» dep baǵalady.

Jýrnalıster aldynda sóılegen sózinde Bass prezıdent Donald Tramptyń Los-Andjeleske ásker kirgizý týraly sheshimin túsindirip ótti. Onyń aıtýynsha, Tramp ákimshiligi bastapqyda reıdter tek qylmyskerler men qamaýǵa alý týraly orderi bar adamdarǵa baǵyttalady dep málimdegen. Alaıda is júzinde bılik ókilderi adamdardy tikeleı jumys oryndarynan ustap jatyr.

— Bizge naqty kimderdiń qamaýǵa alynatyny týraly aqparat berilgen joq. Menińshe, bizdiń qalany tájirıbe úshin qoldanyp otyr, — dedi Bass.

ICE áreketterine qarsy narazylyqtar

Los-Andjeleste AQSh-tyń Kóshi-qon jáne keden qyzmeti (ICE) ustaǵan zańsyz mıgranttardy qoldaýǵa baǵyttalǵan narazylyqtar jalǵasyp jatyr. Bul sherýler jappaı qamaýlar men polıtsııamen qaqtyǵystarǵa ulasýda.

Prezıdent Tramp Ulttyq gvardııany tártipti qalpyna keltirý maqsatynda engizip jatqanyn málimdedi. Ol qalalyq jáne shtattyq bılikti demokrat gýbernator men qala ákimshiligin qoǵamdyq tártipti qamtamasyz ete almady dep aıyptady. 

Aıta ketelik Nıý-Iorkte ımmıgratsııalyq reıdterge qarsy narazylyq aktsııasy ótken edi. 

Buǵan deıin AQSh bıligi narazylyq bildirýshiler men qaýipsizdik kúshteri arasyndaǵy qaqtyǵys kezinde Los-Andjeleske taǵy 2000 ulttyq gvardııashy men 700 teńiz jaıaý áskerin jiberip jatqany habarlanǵan.