Los-Andjeles áýejaıynda qaýipsizdik qyzmetkerin óltirgen adamnyń esimi jarııalandy
ASTANA. 2 qarasha. QazAqparat - Polıtsııa Los-Andjeles halyqaralyq áýejaıynyń 3-shi termınalynda oq atqan adamnyń esimin atady. Ol 23 jastaǵy Pol Entonı Chıanchıa bolyp shyqty, dep habarlady Associated Press.
Atystyń saldarynan kólik qaýipsizdigi federaldy agenttiginiń qyzmetkeri mert boldy. Taǵy alty adam jaraqattandy. Shabýyl jasaýda qylmysker vıntovkany qoldanǵan.
Bastapqyda shabýyl jasaýǵa eki adam qatysqan, olardyń bireýi óltirildi degen aqparat taraǵan. Endi osy qylmysqa baılanysty aqpar naqtylandy. Shabýyldy ol ózi jalǵyz uıymdastyrǵan. Polıtseıler qylmyskerdi jaralady, ol qazir aýrýhanada jiti baqylaýda.
Atysty uıymdastyrǵan adamnyń sómkesinen polıtseıler qarý men úkimetke qarsy mazmundaǵy materıaldar tapqan. Olardyń naqty ne jaıly ekendigi belgisiz.
Bolǵan jaǵdaıǵa baılanysty áýejaı ákimshiligine jolaýshylardy shuǵyl túrde áýejaıdan shyǵarýǵa týra keldi. 746 reıs toqtatylyp, keıinge qaldyryldy.
Osy jaǵdaıǵa baılanysty AQSh Prezıdenti Barak Obama aqparattandyryldy. Alaıda Aq úı tarapynan resmı túrde eshqandaı málimdeme jasalǵan joq.
