Los-Andjeles-2028 Olımpıadasyna volonter qabyldaý bastaldy
ASTANA. KAZINFORM — Los-Andjeleste ótetin Olımpıada jáne Paralımpıada oıyndarynyń uıymdastyrý komıteti volonterlik baǵdarlamaǵa ótinim qabyldaýdyń bastalǵanyn jarııalady, dep habarlaıdy UOK baspasóz qyzmeti.
Kandıdattardy tirkeý 2026 jylǵy 14 shildede, ıaǵnı Olımpıadanyń ashylý saltanatyna dál eki jyl qalǵanda bastalady.
Resmı aqparatqa sáıkes, volonterlik korpýstyń quramyna shamamen 60 myń adam enedi. Olar Olımpıada jáne Paralımpıada oıyndary kezinde álemdegi eń iri kópsalaly sporttyq is-sharany uıymdastyrýǵa kómektesedi.
Bolashaq volonterler sportshylar men qonaqtardy qarsy alyp, olarǵa baǵyt-baǵdar beredi, sport nysandaryndaǵy kórermenderge kómektesedi, navıgatsııalyq qyzmet atqarady, sondaı-aq medıtsınalyq súıemeldeý men aýdarma sııaqty túrli baǵyttar boıynsha qoldaý kórsetedi.
Volonterlik oryndardyń basym bóligi Úlken Los-Andjeles óńirinde usynylady. Sonymen qatar, Olımpıada oıyndarynyń jekelegen jarystary ótetin AQSh-tyń basqa qalalaryndaǵy sport nysandary úshin de eriktiler qabyldanady.
Oıyndardyń volonterlik baǵdarlamasy eki baǵyttan turady. Birinshi baǵyt Olımpıadaǵa daıyndyq kezeńinde Los-Andjeles pen onyń mańynda uıymdastyrylatyn qoǵamdyq, sporttyq jáne ekologııalyq bastamalarǵa qatysýdy qamtıdy. Ekinshi baǵyt Olımpıada jáne Paralımpıada oıyndary kezinde tikeleı qyzmet atqarýdy kózdeıdi.
Uıymdastyrýshylardyń aıtýynsha, daıyndyq kezeńindegi is-sharalarǵa qatysý úmitkerlerge tájirıbe jınaqtaýǵa, iri sporttyq jarystardy uıymdastyrý úderisimen tanysýǵa jáne Olımpıada qozǵalysynyń bir bóligine oıyndar bastalǵanǵa deıin-aq aınalýǵa múmkindik beredi.
Baǵdarlamaǵa qatysý úshin úmitkerler Olımpıada bastalǵan sátte keminde 18 jasta bolýy jáne aǵylshyn tilin meńgerýi qajet. Árbir volonter Olımpıada nemese Paralımpıada oıyndary kezinde uzaqtyǵy shamamen segiz saǵat bolatyn keminde on aýysymda jumys isteýi tıis. Baǵdarlamaǵa qatysýǵa ótinimdi osy silteme arqyly joldaýǵa bolady.
Eske salsaq, Los-Andjelestegi Olımpıada oıyndary 2028 jyldyń 14-30 shilde aralyǵynda, al Paralımpıada oıyndary 15-27 tamyz aralyǵynda ótedi.
Buǵan deıin Los-Andjeles–2028 Olımpıadasynyń tolyq kestesi jarııalandy.
