Lorentso Sımonellı: Eń tıimdi ınvestıtsııa - adamǵa salynǵan ınvestıtsııa

NUR-SULTAN. QazAqparat - Baker Hughes, a GE company prezıdenti Lorentso Sımonellı qazaqstandyq munaı mamandaryn oqytýdy usyndy. Munaı-gaz salasy boıynsha álemdegi úshinshi iri kompanııa sanalatyn Baker Hughes prezıdenti óndiriske qazaqstandyq jastardy tartýǵa nıetti ekenin aıtty, dep habarlaıdy QazAqparat tilshisi.

«Sońǵy ondaǵan jylda astanalaryńyz ósip, álemdik deńgeıde ınvestorlar úshin tartymdy elge aınaldy. Bizdiń kompanııa úshin adam - basty aktıv. Indýstrııalyq damýda bul óte mańyzdy. Jumysshylardy damytýǵa kóp kóńil bólýimiz kerek. Keleshekte barlyq jumysshylar kásibı biliktilikten bólek, tehnologııalyq bazany tolyq meńgerýi kerek», - deıdi kompanııa prezıdenti.

Ol sondaı-aq, Batys Qazaqstan oblysynda munaı-gaz mamandaryn oqytatyn ortalyq ashýǵa daıyn ekenin aıtty.

«2005 jyly bizdiń kompanııa tuńǵysh korporatıvtik ýnıversıtet ashty. Barlyq salada tsıfrlandyrý júrip jatyr. Sondyqtan jumysshylardyń soǵan saı bolýy mańyzdy. Biz qazir ǵylym, tehnologııa, ınjınırıng jáne matematıka salalaryna basymdyq berip otyrmyz. Osy ýaqytta biz 140 kompanııada 35 ulttyń ókilin, ıaǵnı 1100 adamdy bilikti maman etip daıyndadyq. Qazaqstan boıynsha munaı-gaz salasynyń mamandaryn daıyndaý jobasyn daıyndap jatyrmyz. Batys Qazaqstanda oqytý ortalyǵyn ashamyz. Ol jerde munaı-gaz salasynyń stýdentteri praktıkadan ótip, qaýipsizdik erejelerin meńgeretin bolady», - dedi Lorentse Sımonellı.

Forým aldynda memleket basshysy Qasym-Jomart Toqaevtyń qabyldaýynda bolǵan Lorentso Sımonellı Qazaqstandy ekinshi úıine teńegen bolatyn.