L'Oreal kompanııasynyń murageri 100 mlrd dollar dáýleti bar alǵashqy áıel atandy

L'Oreal kosmetıkalyq kompanııasynyń murageri Fransýaza Betankýr Maıers álemde dáýleti 100 mlrd dollarǵa jetken birinshi áıel boldy. Kazinform bul týraly TASS aqparat agenttigine silteme jasap habarlaıdy. 

Bloomberg-tiń mıllıarderler ındeksi málimetine sáıkes, beısenbide onyń baılyǵy 100,2 mlrd dollarǵa deıin ósken. Buǵan 1909 jyly onyń atasy negizin qalaǵan L'Oreal kompanııasy aktsııalarynyń rekordtyq joǵary baǵasy septigin tıgizdi. 

70 jastaǵy Fransýaza Betankýr Maıers quny 268 mlrd dollardy quraıtyn kompanııa tóraǵasynyń orynbasary qyzmetin atqarýda. Ol jáne onyń otbasy aktsııalardyń 35%-yna ıe. 

L'Oreal murageri Forbes jýrnalynyń nusqasy boıynsha 2021, 2022 jáne 2023 jyldary úsh ret álemdegi eń baı áıel atandy.