Lopes kontserti: Almaty men Astanadaǵy qonaqúı baǵalary 3–5 esege deıin qymbattaýy múmkin

ALMATY. KAZINFORM — Álemge tanymal amerıkalyq ánshi ári aktrısa Djennıfer Lopes óziniń álemdik týry aıasynda Qazaqstanda eki kontsert ótkizedi: 1 tamyzda — Astanada, 10 tamyzda — Almatyda. Bul kontsertterdiń aıyrmashylyǵy týraly «Astana Kontsert» kompanııasynyń prodıýseri Málik Hasenov aıtyp berdi. 

Onyń aıtýynsha, Djennıfer Lopestiń kontsertin ótkizý quqyǵy úshin Reseı, BAÁ jáne Eýropanyń prodıýserleri de talasqan. Alaıda tańdaý osyǵan deıin álemdik juldyzdardyń kontsertin sátti uıymdastyrǵan qazaqstandyq kompanııaǵa tústi.

— Infraqurylym jaǵynan eshqandaı qıyndyq týyndamaıdy dep oılaımyz. Qaýipsizdik máselesine qatysty arnaıy jıyn ótti, óıtkeni mundaı aýqymdy sharalarǵa kóp adam jınalady. Biz Almaty men Astana ákimdikterimen birlesip barlyq qaýipsizdik sharasyn jan-jaqty pysyqtadyq. Qonaqtar men ártisterdiń qaýipsizdigi birinshi orynda bolady, — dedi prodıýser.

Almatyda kontsert ótetin kúnderi Baıtursynov, Sátpaev kósheleri men Abaı dańǵyly boıynda ýaqytsha kólik qozǵalysyn shekteý josparlanyp otyr. Stadıonǵa kiretin esik Sátpaev kóshesi jaǵynan ashylady, saǵat 15:00–den bastap kórermender kire alady. Qonaqtarǵa erterek kelýge keńes beriledi.

Shara baǵdarlamasyna kelsek, uıymdastyrýshylar kontserttiń barlyq qalada birdeı formatta ótetinin aıtty.

— Djennıfer Lopes jalǵyz kelmeıdi — onymen birge 100-den astam adamnan turatyn komanda keledi. Bul — álemdik deńgeıdegi shoý: bıshiler, prodıýserler, menedjerler, jaryq sýretshileri, rejısserler jáne tehnıkalyq mamandar. Lopestiń mansaby bıshi retinde bastalǵanyn bilesizder — sondyqtan ol horeografııaǵa erekshe mán beredi. Bizdi barlyq qalada birdeı qoıylatyn keremet bı shoýlary kútedi. Qazaqstan mundaı deńgeıdegi perfomans kórmegen dese de bolady. Sahnada 100-den astam adam, al basty rólde — sýperjuldyz. Baǵdarlamada — jıi kostıým aýystyrý, árbir ekinshi ánnen keıin jańa beıneler bolady, — dep bólisti Málik Hasenov.

Almatydaǵy Ortalyq stadıonda kontsert aldynda tek jeńil jóndeý jumystary júrgiziledi, kúrdeli qurylys nemese ózgerister qarastyrylmaǵan.

Sonymen qatar, Hasenov Djennıfer Lopeske arnaıy mádenı baǵdarlama usynylatynyn aıtty.

— Ár qalada biz ártiske barýǵa bolatyn mádenı oryndardyń tizimin usynamyz. Djennıfer Lopes jergilikti ónerge qyzyǵýshylyq tanytyp, ashyq qarym-qatynas ornatýǵa daıyn. Ol naqty qaı jerlerge baratyny kontsertke jaqyn kúnderi belgili bolady. Bul onyń kóńil-kúıine jáne fızıkalyq jaǵdaıyna baılanysty, — dedi prodıýser.

Sonymen qatar, uıymdastyrýshylar Lopes ulttyq taǵamdarmen tanysqysy keletinin jetkizdi. Ánshige ulttyq taǵam — et usyný josparda.

Aıta ketetin jaıt, kontsert ótetin kúnderi Almaty men Astanadaǵy qonaq úı baǵalary 3–5 esege deıin qymbattaýy múmkin. Bul — álemdik tájirıbede bar dúnıe.

— Bizdiń bul jaǵdaıǵa kózqarasymyz oń. Týrıster kelip demalady, aqsha jumsaıdy — bul óz kezeginde qalanyń bıýdjetine salyq túsimderi arqyly paıda ákeledi, — dep túıindedi sózin Hasenov.

Osyǵan deıin Almatyǵa Djennıfer Lopestiń kontsertin tamashalaýǵa 29 elden kórermen keletini týraly jazǵan bolatynbyz.

Eske salaıyq, buǵan deıin prodıýser Málik Hasenov Djennıfer Lopes 10 tamyz kúni Almatynyń Ortalyq stadıonynda jeke kontsertin ótkizetinin aıtqan edi. 

Keıin «Qaırat» fýtbol klýby bul is-sharaǵa kelisim bermegenin habarlady. 

Artynsha, Almatyda 10 tamyzda «Qaırat» — «Jeńis» oıyny emes, Djeı Lonyń kontserti ótetini belgili boldy. 

Aıta keteıik, amerıkalyq aktrısa jáne ánshi Djennıfer Lopes týr aıasynda Qazaqstanda eki kontsert ótkizedi.