Lonely Planet: Mońǵolııa – saıahat úshin úzdik eldiń biri

Lonely Planet — saıahat týraly aqparat taratatyn álemdegi eń tanymal týrıstik basylymdardyń biri. Jaqynda 50 jyldyǵy qarsańynda basylym Mońǵolııany 2024 jyly saıahattaýǵa bolatyn úzdik elderdiń qataryna qosty. Kazinform bul týraly MONTsAME agenttigine silteme jasap habarlaıdy.

Mońǵolııaǵa barýdy josparlap júrgen týrıster erekshe tabıǵat, ulttyq mýzyka, býýz syndy taǵamdarǵa tamsanyp, Naadam dástúrli merekesine qatysyp, atpen serýendeı alady.

Sonymen qatar, Orhon ózeni ańǵary tabıǵı kesheni mindetti túrde kórý kerek oryn retinde usynylǵan.

Mádenıet mınıstrliginiń habarlaýynsha, Mońǵolııa úkimeti 2023-2025 jyldardy «Mońǵolııaǵa saıahattaý jyldary» dep jarııalaǵan. 

Mońǵolııany damytý jumystaryn kezeń-kezeńimen oryndaý – áýe kóligin jeńildetý, tsıfrlyq týrızmge kóshý, halyqaralyq týrıstik standarttardy engizý oń nátıje kórsetip jatyr.