Londonnyń Koroldik mýzyka akademııasyn bitirgen alǵashqy qazaqstandyq skrıpkashy A.Orazbaeva Almatyda jeke kontsertin beredi
ASTANA. 12 qyrkúıek. QazAqparat - Londonnyń Koroldik mýzyka akademııasyn bitirgen alǵashqy qazaqstandyq skrıpkashy - Aısha Orazbaeva Almaty qalasynda kontsert beredi.
Jas skrıpkashynyń Qazaqstan Respýblıkasy Táýelsizdiginiń 20 jyldyǵyna arnalǵan jeke kontserti J.Jabaev atyndaǵy Qazaq memlekettik fılarmonııasynda ótedi. QR memlekettik sımfonııalyq orkestrdiń súımeldeýimen ótetin kontserttiń kórkemdik jetekshisi jáne bas dırıjeri - Vag Papıan.
25 jastaǵy A.Orazbaeva - Londondaǵy Koroldik mýzyka akademııasynyń alǵashqy qazaqstandyq túlegi. Prezıdenttik «Bolashaq» baǵdarlamasynyń stıpendıaty jáne de Italııadaǵy UNESCO-nyń qamqorlyǵyndaǵy halyqaralyq "Trio di Trieste" stıpendııasynyń ıegeri. 2008 jyly Koroldik Akademııany joǵary nátıjemen támámdap, 2010 jyly akademııanyń magıstri dıplomyn aldy.
Qazaqstandyq skrıpkashy Akademııada Lıdııa Mordkovıch, Remýs Azoıteıa jáne Klıo Gýld sııaqty professorlardan dáris alǵan. Ol Eýropa, Orta Azııa jáne de Gonkong elderi sahnasynda jıi óner kórsetedi. Iohannes Marıa Shtaýd, Per Býlez, Ser Harrıson Bertvısl jáne Pıter Zınovev syndy álemge áıgili kompozıtorlarmen jumys jasaıdy. Jaqynda olarmen birlesip, skrıpka men elektronıkaǵa arnalǵan "OUR" kontsertin jazdy. Jáne bul talant ıesi jetistikteriniń tolyq tizimi emes. 2011 jyldyń qarashasynda Aısha Ulybrıtanııada jeke albomyn shyǵarýdy josparlap otyr.
