Londondyq strıt-art sýretshi Almatydaǵy úılerge sýret salyp júr
ALMATY. QazAqparat - Almatyda qala ákimdiginiń qoldaýymen «Mural Fest» halyqaralyq monýmentaldy dekoratıvti jazý festıvali ótip jatyr, dep habarlaıdy QazAqparat tilshisi.
Qurmanǵazy men Pýshkın kósheleriniń qıylysyndaǵy úıdiń qabyrǵasyn belgili londondyq strıt-art sýretshi Jay Fanakapan árlep shyqty.
«Men Almatyǵa alǵash ret kelip otyrmyn. Munda men oılaǵannan da qyzyqty eken. Almatynyń taýlary men jaıdary adamdary kóńilimnen shyqty. Men ádette birtekti, tek sur ári altyn reńktermen ǵana jumys isteıtinmin. Biraq Almatynyń kógildir aspany men jasyl jelegin jetkizý úshin kóp tústerdi paıdalanýǵa týra keldi. QZ áripteri - Qazaqstannyń bolashaqtaǵy dáýirin sýretteıdi», - dedi sýretshi.
Jay Fanakapannyń aıtýynsha, ol ómirinde birinshi ret óte úlken árip jazyp jatyr eken.
«Tipti Dýbaıdyń aspanmen astasqan ǵımarattarynyń ózinde men mundaı kólemde beıne salǵan joqpyn. Meni qazir kırıllıtsa álipbıi qyzyqtyryp otyr. Bolashaqta osy baǵytta jumys jasaýym múmkin», - dedi «Mural Fest» festıaliniń qatysýshysy.
Aıta ketý kerek, kórkem grafıka saıysy byltyrdan beri jalǵasyp keledi.
Bıyl úılerdiń qasbetin Ulybrıtanııadan, Ýkraınadan, Reseıden, Qyrǵyzstannan kelgen sýretshiler men 1 qazaqstandyq sýretshi árleıtin bolady.
Osynyń arqasynda qaladaǵy kóptegen úılerde jańa beıneler paıda bolady. Al Naýryzbaı aýdanynda arnaıy qabyrǵaǵa sýret salynady.
Ýaqyttyń tyǵyzdyǵyna baılanysty sýretshiler 12 saǵat boıy talmastan jumys jasap jatyr.
Alataý aýdanynda «Almaty arena» ǵımaratynan tómenirekte reseılik sýretshi Georgıı Kýrınov bir úıdiń qabyrǵasyna sýret salyp jatyr. Onyń jumystaryn Krasnodar, Rostov, Stavropol, Ekaterınbýrg, Qazan, Mýrmansk men Eýropanyń birqatar qalalarynan kórýge bolady.
Almatydaǵy 5 qabatty úıdiń qabyrǵasynda ol EKSPO taqyrybyna keletin bolashaqtaǵy tabıǵı jylý energııasymen jylytylatyn úıdiń sýretin salǵan.
Ýkraınalyq Andreı Polıval Bostandyq aýdanyndaǵy úılerdiń birinde qazaqtyń qusbegilik ónerin beınelemekshi.
Qazaqstandyq sýretshi Álı Zákir Áýezov óz ónerinde Aral teńiziniń problemasyn kótermek.
«Meniń jumysym tek Aral teńiziniń ekologııalyq ahýaly týraly ǵana emes, ómirdiń ótpeliligi týraly da. Burynǵy zattardyń ornyna jańasy keledi. Ótkenniń estelikterimen ne isteýge bolady degen oıda qaldym», - dedi Álı Zákir.
Túrksib aýdanyndaǵy úılerdi Qyrǵyzstannan kelgen sýretshiler árlep jatyr.
Festıvaldi uıymdastyrýshy «Balalar álemniń sýretin salady» qorynyń qoldaýymen strıt-art qozǵalysy kelesi jyly Taldyqorǵan, Shymkent jáne Pavlodar qalalarynda jalǵasady.
