Londondyq rejısser Pavlodar teatrynda Brehtiń «Peri qatyn» dramasyn sahnalady
PAVLODAR. KAZINFORM - J.Aımaýytov atyndaǵy Pavlodar oblystyq qazaq mýzyka-drama teatrynyń ujymy kórermenge nemis da Bertolt Brehtiń «Peri qatyn» dramalyq absýrdyn usyndy.
Premeralyq qoıylymnyń qoıýshy rejısseri - Azııa jáne Eýropa elderindegi teatr ujymdarynyń táýelsiz rejısseri Ovlıakýlı Hodjakýlı.
Qoıylymdy aýdarǵan – Asylbek Ihsanov.
Shyǵarmadaǵy oqıǵa Ortalyq Eýropadaǵy 1618-1648 jyldar aralyǵynda oryn alǵan otyz jyldyq soǵys barysynda órbigeni málim. Al Júsipbek teatrynyń nusqasy boıynsha sahnalanǵan qoıylym soǵystaǵy jaǵdaı adamzat tarıhynyń kez kelgen merziminde oryn alýy múmkin ekenine meńzeıdi.
Peri áıel óz qursaǵynan shyqqan úsh balasyna qaýip tóndirip turǵan soǵys esebinen baıýdy kózdeıdi. Basty keıipker – Bektory Aıýkeniń Balaýsa esimdi mylqaý qyzy, Altyn Kekil jáne Úırek esimdi uldary bar. Uldyń úlkeni Altyn Kekil - dańǵoı, maqtanshaq, al kishisi jýastaý, biraq alańǵasarlaý jigit. Anasy kúımemen el aralap, saýda jasap, balalaryn janyna ertip júredi. Birde áskerge soldat jınaýshylar saý ete túsip, bulardyń ómirinde alasapyran ýaqyt bastaldy.
Óz paıdasyn balalarynyń ómirinen bıik qoıǵan esirgen ana aqyr-sońy barlyq balasynan aırylady.
Dramalyq absýrdta dala teatry, plastıkalyq teatr, bı teatry jáne mýzykalyq teatr sııaqty birneshe janrdyń toǵysy bar. Keıde tótennen zamanaýı bıdiń yrǵaǵy ilestirip áketse, endi birde «Qyz Jibektiń» arııasy, «Súgirdiń termesi» oryndalyp jatty. Osynyń barlyǵyn rejısser men akterler qııýlastyryp, kelistire bilgeni de sheberlik.
Atap óterligi, «Peri qatyn» Bertolt Brehtiń «Esirgen shesheı jáne onyń balalary» shyǵarmasy men ózge de týyndylarynyń jelisi boıynsha sahnalandy.
Premeraǵa Júrgenov atyndaǵy Qazaq ulttyq óner akademııasy teatr óneriniń tarıhy men teorııasy kafedrasynyń aǵa oqytýshysy, ónertaný magıstry Aıjan Ahmet arnaıy kelip, akterlerdiń ónerine óz baǵasyn berdi.
Eske sala keteıik, Memleket basshysy bıznes ókilderin aımaqtyq teatrlardy qoldaýǵa shaqyrdy.
