Londondaǵy Olımpıada kesheni qalalyq saıabaqqa aınaldy
ASTANA. QazAqparat - Sońǵy ǵasyrda ashylǵan Londondaǵy eń úlken saıabaq - Elızaveta patshaıym atyndaǵy Olımpıadalyq saıabaq tolyq qýatynda jumys isteı bastady.
Keshe sý sport túrleri ortalyǵy, velopark, aınalany qaraıtyn alańqaıy bar 115 metrlik Orbit munarasy, kóptegen serýen joldary, sýburqaqtar, balalar alańqaılary men dámhanalar ornalasqan onyń «ekinshi kezegi» ashyldy, dep habarlady RIA «Novostı».
Saıabaq táýlik boıy jumys isteıdi, oǵan kirý tegin. Ázirge olımpıadadan keıingi ómirge beıimdelmegen saıabaqtaǵy jalǵyz nysan - olımpıada stadıony. Kelesi jyly ony ýaqytsha regbı chempıonatyn ótkizý úshin ashý josparlanýda, al 2016 jyldan bastap «Vest Hem» fýtbol komandasynyń bazasy retinde turaqty iske qosylmaq.
2012 jylǵy London Olımpıadasyna arnap salynǵan keshendi qaıta jabdyqtaýǵa bir jyl ketti jáne oǵan 12,5 mıllıard fýnt sterlıng (19 mıllıard dollar) ınvestıtsııa jumsaldy. Al olımıpıadaǵa daıarlyqqa, sonyń ishinde sporttyq ǵımarattar salýǵa Ulybrıtanııa úkimeti 8,77 mıllıard fýnt sterlıng (13,4 mıllıard dollar) bıýdjet qarajatyn jumsaǵan bolatyn.
Úkimet oryndary Olımpıadalyq ınfraqurylymdar nysandaryn paıdalanýdan bıýdjetke túsimder kólemin 13 mıllıard fýnt sterlıng (20 mıllıard dollar) bolady dep baǵalaýda.
