Londondaǵy Naýryz toıynda qazaqtyń jyr-termeleri oryndalady
QYZYLORDA. QazAqparat - Qyzylordalyq «Aqmeshit» folklorlyq ansambli Anglııa astanasy - London qalasynda ótetin Naýryz toıyna qatysatyn boldy, dep habarlaıdy QazAqparat tilshisi.
Merekelik shara «Victoria Embankment Gardens» saıabaǵynda ótedi. Syr óńiriniń óner ujymy tumandy Albıon tórinde túrli janrdaǵy mýzykalyq shyǵarmalardy tartý etpek. Ónerpazdar Dáýletkereıdiń «Kóruǵly», Yqylastyń «Jezkıik» sekildi kúılerin el nazaryna usynady. Sondaı-aq olar álemdik klassıkalyq týyndylardy oryndap, jeke ónerpazdar jyr-termeler usynady.
«Ansambl repertýarynda 100-den astam qazaq kúıleri men zamanaýı óńdelgen mýzykalyq shyǵarmalar bar. Óner ujymy 12 adamnan turady. Olar halyqaralyq, respýblıkalyq baıqaýlar men festıvaldardyń jeńimpazdary. Ansambl 2009 jyly oblystyq fılarmonııa janynan quryldy. Sodan beri Syr boıynyń tóltýma ónerin, qazaq ulttyq folkloryn nasıhattap kelemiz. London tórinde ulttyq ónerimizdi joǵary deńgeıde kórsetýge kúsh salamyz», deıdi oblystyq fılarmonııa dırektory Talǵat Maqashev.
Aıta ketý kerek, keıingi kezeńde oblys basshylyǵynyń qoldaýymen ansambl Reseı, Túrkııa jáne Ózbekstan elderinde gastroldik saparmen bolyp qaıtty.
Ádilet Qańtarbaıuly
