Londondaǵy Investıtsııalyq forým: Sheteldik kompanııalardy Qazaqstanǵa relokatsııa qyzyqtyrdy
Forým álemge áıgili London qor bırjasynda bıyl besinshi ret uıymdastyryldy. Maqsaty ınvestorlardy tolyq jáne keshendi aqparatpen qamtamasyz etý. Qazaqstannyń Ulybrıtanııadaǵy Elshisi Maǵjan Іlııasov jınalǵandarǵa el ekonomıkasyna qarajat quıýdyń artyqshylyqtary týraly aıtyp berdi. Sondaı-aq yqtımaldy syn-qaterlerdi birge talqylaýǵa shaqyrdy. Kópshilikti, ásirese, ókildikterin Reseıden Qazaqstanǵa kóshirý máselesi qyzyqtyrdy. Relokatsııa boıynsha sheshim qabyldap úlgergender tájirıbelerimen bólisti.
«Biz ónimderimizdi Qazaqstanǵa eksporttaýmen birneshe jyldan beri aınalysyp kelemiz. Geografııalyq turǵyda mekenjaıymyzdy ózgertetin kezeńge jettik dep oılaımyz. Qazaqstandy Ortalyq Azııadaǵy hab retinde qarastyra otyryp, kóshýge óte tamasha oryn dep sheshtik. Bıznes ashý jáne júrgizý úshin sizderde óte qolaıly jaǵdaılar jasalǵan», - deıdi United Concrete canvas Ltd kompanııasynyń bıznesti damytý jónindegi dırektory Devıd Keshman.
Eki el arasyndaǵy áriptestiktiń 30 jyly ishinde Ulybrıtanııa Qazaqstan ekonomıkasyna 20 mıllıard dollardan astam qarajat quıǵan. Sońǵy 2 jylda pandemııa saldaryna qaramastan ınvestıtsııa Tumandy Albıonnan turaqty túrde tartylyp turdy. Al 2020 jyly 36%, 2021-de 20% artty. Ekijaqty saýdada da oń dınamıka baıqalady - aǵymdaǵy jyldyń 9 aıynyń qorytyndysy boıynsha Qazaqstan men Ulybrıtanııa arasyndaǵy saýda kólemi 61% ulǵaıǵan.
«Investıtsııa aǵynyn ári qaraı yntalandyrý úshin Qazaqstanda jasalyp jatqan is-sharalardy túsindirý úshin keldik. Máselen, jańa ınstrýmentter paıda bolyp jatyr. Ol tek barlyq elderde bar baıaǵy baj, kedendik jeńildetý máseleleri ǵana emes. Bizde byltyrdan beri strategııalyq-ınvestıtsııalyq kelisimshart paıda boldy. Sol týraly túsindirme jumystaryn júrgizip, kezdesýler ótkizip jatyrmyz», - deıdi QR SІM Investıtsııalar komıtetiniń tóraǵasy Ardaq Zebeshev.
Elimizde búginde Brıtanııanyń barlyǵy 575 kommertsııalyq kompanııasy belsendi túrde áreket etedi. Olar munaı-gaz, taý-ken jáne ónerkásip, sondaı-aq qarjylyq qyzmet, joǵary tehnologııalar men aýyl sharýashylyǵy salalarynda jumys isteıdi. Ulybrıtanııa úkimeti de bıznes baılanystardy keńeıtý men tereńdetýge yqylasty.
«Biz Qazaqstanmen áriptestik ornatqysy keletin osyndaǵy eksporttaýshylarǵa da, qazaqstandyq múddeli taraptarǵa da qoldaý bildirýge daıynbyz. Ulybrıtanııadan taýarlar men qyzmetter satyp alýǵa nıetti kompanııalarǵa, densaýlyq saqtaý, bilim, ınfraqurylym, energetıka sııaqty iri jobalarǵa qatysqysy keletin mekemelerge qol ushyn soza alamyz», - deıdi Ulybrıtanııa Saýda jáne ónerkásip mınıstrliginiń departament basshysy Vomık Nýr Shah.
Forým barysynda ınvestıtsııa, telekommýnıkatsııa jáne jasyl energetıka salasynda jumys isteıtin kompanııalarmen eki jaqty kezdesýler ótkizilip, yntymaqtastyq múmkindikteri talqylandy. Budan bólek brıtanııalyq bıznes tsıfrlandyrý, densaýlyq saqtaý, óńdeý ónerkásibi sııaqty salalarda birlesken jobalardy belsendi túrde júzege asyrýǵa shaqyryldy.
