Londondaǵy referendým áli jalǵasyp jatyr

LONDON. KAZINFORM - Tumandy Albıondaǵy №376 daýys berý ýchaskesinde ótip jatqan saıası naýqan ýaqyt ereksheligine baılanysty birer saǵattan keıin aıaqtalmaq, dep habarlaıdy Kazinform tilshisi.

Qazaqstannyń Ulybrıtanııadaǵy elshiliginde ornalasqan №376 daýys berý ýchaskesine kelýshilerdiń qarasy sıredi. London ýaqyty boıynsha saǵat 8-de ǵımarat esigi jabylyp, bıýlettenderdi sanaý bastalady. Elshilik qyzmetkerleri daýys berý protsesiniń ashyqtyǵy men ádildigin, ýchaskeniń úzdiksiz jumysyn, sondaı-aq otandastarymyzdyń qaýipsizdigin qamtamasyz etý úshin bar kúshin saldy. Búgin, ásirese, «Bolashaq» stıpendııasynyń «500 ǵalym» baǵdarlamasy boıynsha taǵylymdamadan ótip jatqan stýdentter belsendilik tanytty.

«Shetelge kelgen kezde referendým ótetini týraly oılaǵan joq edik. Habar estisimen beı-jaı qarap otyra almadyq. Daýys bergenimizge óte tolqyp turdyq. Bir jaǵynan qýanyp turmyz»,- deıdi ǵylymı taǵylymdamadan ótip jatqan stýdent Sántaı Tileýbaeva.

«Referendýmǵa belsendi qatysyp otyrǵandaǵy maqsatymyz Qazaqstan respýblıkasynyń azamaty retinde ózimizdiń kózqarasymyzdy bildirý»,-dedi taǵy bir ǵalym Aqmaral Qojabekova.

Aıta ketý kerek túske taman daýys berýshilerdiń sany tańerteńgi ýaqytqa qaraǵanda artty. Aralarynda Redıng, Manchester, Aberdın, Glazgo qalalarynda ýaqytsha nemese turaqty turyp jatqan otandastarymyz, osynda saıahattap júrgen týrıster kóp. Komıssııa músheleriniń aıtýynsha, ýchaske jabylǵannan keıin Londondaǵy referendým nátıjeleri belgili bolady. Saıası mańyzy bar naýqannyń aldyn ala qorytyndysy erteń halyqqa jarııa etiledi.