Londondaǵy eń iri áýejaı órt saldarynan bir táýlikke jabyldy

ASTANA. KAZINFORM — Londondaǵy «Hıtroý» áýejaıy juma kúni tolyq bir kúnge jabylady. Áýejaıdy jabýǵa ony elektr qýatymen qamtamasyz etetin qosalqy stansadaǵy órt sebep boldy. Órttiń neden shyqqany belgisiz, dep habarlaıdy VVS.

— Londondaǵy «Hıtroý» áýejaıyn elektr qýatymen qamtamasyz etetin qosalqy stansadaǵy órtke baılanysty áýejaıda elektr energııasynyń aıtarlyqtaı úzilýi baıqalyp otyr. Jolaýshylar men áýejaı qyzmetkerleriniń qaýipsizdigin qamtamasyz etý maqsatynda áýejaı 21 naýryz kúni saǵat 23:59–ǵa deıin jabyq bolady. Jolaýshylarǵa áýejaıǵa barýdan bas tartyp, qosymsha aqparat alý úshin ózderiniń áýe kompanııalarymen baılanysý usynylady. Áýejaı ákimshiligi keltirilgen qolaısyzdyqtar úshin keshirim suraıdy, — delingen áýejaıdyń resmı saıtyndaǵy habarlamada.

BBC málimetinshe, London órt qyzmeti jergilikti ýaqyt boıynsha tańǵy saǵat 9:00–de Heıs qalasyndaǵy qosalqy stansadaǵy órttiń «baqylaýǵa alynǵanyn» habarlady. Órtti sóndirýge 70-ke jýyq órt sóndirýshi jumyldyrylǵan. Órt qyzmetiniń habarlaýynsha, qosalqy stansadaǵy transformator janǵan.

Osy jaǵdaıǵa baılanysty ondaǵan áýe kompanııasy Londonǵa baǵyttalǵan reısterin toqtatýǵa májbúr boldy. Ushýlaryn toqtatqan kompanııalardyń qatarynda brıtandyq Virgin Atlantic jáne British Airways, ırlandııalyq Aer Lingus, amerıkalyq United Airlines, úndistandyq Air India jáne Gonkongtyń Cathay Pacific áýe kompanııalary bar.

Reuters agenttiginiń baǵalaýy boıynsha, bul jaǵdaıdan 60-tan astam áýe kompanııasynyń 700-ge jýyq reısi zardap shekti.

«Hıtroý» áýejaıyna ushyp shyqqan reısterdiń keıbiri bastapqy áýejaılaryna qaıtaryldy nemese basqa aerodromdarǵa baǵyttaldy.

British Airways áýe kompanııasy áýejaıdyń ýaqytsha jabylýy álem boıynsha reıster kestesiniń aıtarlyqtaı ózgerýine ákeletinin málimdedi.

Ulybrıtanııanyń energetıka mınıstri Ed Mılıbend National Grid elektr jelisi kompanııasy elektr energııasyn múmkindiginshe tezirek qalpyna keltirý úshin barlyq sharalardy qoldanyp jatqanyn aıtty. Onyń aıtýynsha, órttiń naqty sebebi áli belgisiz.

— Bul suraqqa jaýap berý úshin áli tym erte. Órttiń neden shyqqanyn bilmeımiz. Bul, sózsiz, buryn-sońdy bolmaǵan oqıǵa, — dedi mınıstr.

Áýejaı ókiliniń málimdemesine sáıkes, órt sóndirý toptary oqıǵa ornynda jumys istep jatyr.

— Elektrmen jabdyqtaýdyń tolyq qalpyna keltiriletin ýaqyty ázirge belgisiz, — dedi ol.

Heıs aýdanyndaǵy bul órt saldarynan Londonnyń batysyndaǵy myńdaǵan úı jaryqsyz qaldy, al 150-ge jýyq adam evakýatsııalandy.

Eske sala keteıik Astana halyqaralyq áýejaıy jolaýshylarǵa Jeńistiń 80 jyldyǵyna, sondaı-aq Otan qorǵaýshylar kúnine oraı ótetin áskerı sherýge daıyndyq jáne ony ótkizý kezinde ushý kestesinde ózgerister bolýy múmkin ekenin habarlaǵan edi.