Londondaǵy elshiliktegi saılaý ýchaskesi AES referendýmyna daıyndalyp jatyr

LONDON. KAZINFORM – London ýaqyty Astana ýaqytynan 4 saǵat artta ekenin eskersek, 6 qazan kúni Qazaqstanda AES salý máselesine arnalǵan respýblıkalyq referendýmǵa daýys berý de dál sondaı ýaqytqa kesh aıaqtalady. Bul týraly Anglııadaǵy tilshimiz habarlaıdy. 

Ulybrıtanııa astanasyndaǵy № 376 saılaý ýchaskesi Qazaqstan elshiliginiń ǵımaratynda ornalasqan.

Buǵan deıingi saılaýlardyń tájirıbesi kórsetken, daýys berýshilerdiń sany túske qaraı kóbeıedi. Óıtkeni eldiń ár túkpirinde júrgen qazaqstandyqtar Londonǵa jetken biraz ýaqyt kerek.

Mundaı daýys berýshilerdiń kóbi stýdentter bolady degen esep bar. Buǵan deıin de negizgi belsendilikti stýdentter kórsetetin. Sondaı-aq, osy elde ýaqytsha turyp jatqan, týrıst retinde kelgen, issaparmen júrgen qazaqstandyqtar da elshilik ǵımaratynda óz tańdaýyn jasaı alady. 
«Referendýmǵa daıyndyq qyzý júrip jatyr. Akkredıttelgen jýrnalısterge de osy jerden habar taratýǵa qajetti jaǵdaıdyń bári jasaldy», - deıdi № 376 saılaý ýchaskesiniń tóraǵasy Rýslan Qarabulov.

6 qazanda atalmysh saıdaý ýchaskesi London ýaqytymen tańǵy saǵat 7.00-de ashylyp, keshki saǵat 20.00-de jabylady.