«Londonda jylqy eti joq, qazy-qarta tabý tipti qıyn» - Ulybrıtanııada qazaq dıasporasy Naýryzdy qalaı toılady

LONDON. QazAqparat – Ulybrıtanııada turatyn Qazaq dıasporasynyń ókilderi Naýryz merekesin atap ótti. Erterekte Londonǵa kóship kelgen qandastarymyz dastarhan basynda jınalyp, naýryz kójeden dám tatty, dep habarlaıdy QazAqparat tilshisi.

«Naýryz kójege qozynyń etin qostyq. Qazy joq, qazyny qaıdan tabamyz?», deıdi Ulybrıtanııa qazaǵy Bádıǵa Savash. Ol jergilikti qara kózderdiń basyn biriktiretin dıaspora tóraǵasynyń jubaıy. Bul kúni Bádıǵa hanym Ulystyń uly kúni jasalatyn qasıetti as - naýryz kójeni ómirinde birinshe ret pisirdi. Óıtkeni Túrkııadan osynda kóship kelgen qazaqtar arasynda bul dástúr keńinen taramaǵan.

Londonda jylqy eti joq, qazy-qarta tabý tipti qıyn. Bádıǵa hanym onyń ornyna aǵylshyndar as pisirgende keńinen paıdalanatyn, tiske jumsaq qozynyń etin jáne alty túrli dán qosyp, naýryz kóje jasady. Qyrǵyzstannan jetkizilgen qurt ta astyń dámin keltirgendeı. Bádıǵa hanymnyń Qazaqstannan kelgen stýdentterge degen rızashylyǵy erekshe. «Solardyń aıtýymen naýryz kóje pisirip úırendim», - deıdi ol.

«Qıyn emes. Eshqandaı qıyndyǵy joq eken. Men naýryz kóje degenge kúrdeli as eken dep oılaýshy edim. Óte ońaı jasalatyn kóje eken. Endi budan keıin, bul taǵamdy jylda jasap turarmyn. Dámdi boldy. Qonaqtarǵa unady», - deıdi Bádıǵa Savash.

Qonaqtar qatarynda Ulybrıtanııada jumys babymen turyp jatqan qazaqstandyq Baǵdat Dýskınova da boldy. Ol Oral qalasynyń týmasy. Londonda merekelik sharalardy bezendirýmen aınalysady, joldasy - programmıst. Kópten beri qazaqtarmen qaýyshpaǵandyqtan týǵan jerin saǵynyp qalǵandaryn jasyrmaıdy. Onyń ústine qandastarymen birge Ulystyń uly kúnin atap ótýdiń sáti túsip otyr.

«Basymyzdy qosyp, óziniń úıinde keremet toı ótkizip jatyr. Et asyp, naýryz kóje pisirdi. Jınalǵan qazaqtardyń barlyǵy qýanyshty. Alysta júrgen qandastar birin-biri saǵynady. Bizdiń dástúrimizdi, ulttyq as mázirimizdi saǵynamyz», - deıdi Baǵdat Dýskınova.

Savashtar otbasy - qym-qýyt zamanda Altaı óńirinen Túrkııaǵa odan keıin Ulybrıtanııaǵa qonys aýdarǵan qazaqtar. Londonda turyp jatqandaryna 40 jylǵa jýyq ýaqyt bolǵan. Otaǵasy Ábdisálim Savash - jergilikti qazaq dıasporasynyń tóraǵasy. Onyń aıtýynsha, Londonda ózderi sııaqty qyryqtaı qazaq otbasy turady. Bári de kezinde Túrkııadan Birikken Koroldikke qonys aýdarǵandar. Bir dúıim jurt Táýelsizdik kúni, Naýryz, Aıt sııaqty memlekettik, ulttyq jáne dinı merekelerdi birge toılaıdy.