Londonda jasóspirim galereıanyń sholý alańynan balany laqtyryp jiberdi
LONDON-NUR-SULTAN. QazAqparat – London polıtsııasy alty jasar uldy óltirmekshi bolǵan kúdiktini – 17 jastaǵy jasóspirimdi ustaǵany týraly habarlady. Kúdikti osy demalysta Brıtanııa astanasyndaǵy «Teıt Modern» galereıasynyń sholý alańynda balany bir jarym metrlik qorshaýdan asyryp laqtyryp jibergen, dep habarlaıdy QazAqparat The Guardian basylymyna silteme jasap.
Brıtanııa jańalyqtar agenttiginiń deregi boıynsha, balany jeksenbi, 4 tamyzda «Teıt Modernniń» 10-qabatynda ornalasqan sholý alańynan tastap jibergen. Búldirshin besinshi qabattyń shatyrynan tabylyp, aýyr halde aýrýhanaǵa jetkizildi.
Adam óltirýge oqtalǵan 17 jastaǵy jasóspirimdi kórý alańynda galereıaǵa kelgender ustap alǵan. Keıin ony polıtsııa qyzmetkerleri tutqyndady.
Polıtsııanyń málimetinshe, kúdikti men zardap shegýshi tanys bolmaǵan. Oqıǵa kezinde 6 jasar ul álemge tanymal kórkem galereıada otbasy múshelerimen birge júrgen. Kýágerler sholý alańyna qulaǵan balanyń anasynyń: «Meniń ulym, bul meniń ulym», - dep aıǵaılaǵan daýysyn estigen.
Polıtsııa kúdiktini ustaǵanǵa deıin galereıaǵa kelýshiler ishte bolǵan.
«The Guardian»-nyń aqparatyna sáıkes, 2018 jyly «Teıt Modern» galereıasy Ulybrıtanııanyń týrıster arasynda eń tanymal kórikti oryndarynyń biri bolǵan. Oǵan 5,9 mln adam kelgen.
