Londonda ustalǵan qazaqstandyq sportshy Azamat Teńizbaevtyń máselesi QR SІM baqylaýynda
ASTANA. 2 tamyz. QazAqparat - Londonnyń Hıtroý áýejaıynda ustalǵan qazaqstandyq sportshymen bolǵan oqıǵanyń mán-jaıyn «QazAqparat» tilshisine QR SІM baspasóz hatshysy Nurjan Aıtmahanov tarqatty.
«Ózderińiz biletindeı, aǵymdaǵy jylǵy 24 shildede Qazaqstan azamaty Azamat Teńizbaev Hıtroý áýejaıynda ustaldy. Qazaqstannyń Ulybrıtanııadaǵy elshiliginiń qyzmetkerleri 26 shildede sportshyǵa járdemdesý jáne jalpy jaǵdaıdy anyqtaý maqsatynda onymen kezdesý ótkizdi. Kezdesý barysynda A.Teńizbaev eshqandaı shaǵym aıtqan joq. Elshilik onymen udaıy baılanysta. Elshilik qyzmetkerlerimen kezekti kezdesý 5 tamyzǵa belgilendi.
Atalǵan másele QR SІM baqylaýynda. Buǵan qatysty aqparattardyń túsý shamasyna qaraı sizderge qosymsha habarlaıtyn bolamyz», - dedi syrtqy saıası vedomstvonyń baspasóz hatshysy.
Ol QR Ulybrıtanııadaǵy elshiligi Qazaqstan azamatynyń quqyǵy men múddesin qorǵaıtyn belgili «Martın Mıýrreı» kompanııasynyń qorǵaýshysymen birlese jumys jasap jatqanyn jetkizdi.
