Londonda Ulybrıtanııanyń áskerılendirý saıasatyna qarsy sherý ótti
ASTANA. KAZINFORM – Londonnyń ortalyǵynda Ulybrıtanııa úkimetiniń áskerı shyǵyndardy arttyrý josparyna qarsy sherý ótti, dep habarlaıdy TASS agenttigi.
Sherý Vıktorııa jaǵalaýynan bastalyp, Ulybrıtanııa premer-mınıstriniń Daýnıng-strıt, 10 mekenjaıyndaǵy rezıdentsııasynyń aldynda aıaqtaldy. Qatysýshylar eldiń áskerı áleýetin jedel arttyrý úshin áleýmettik baǵdarlamalarǵa bólinetin qarjyny qysqartýǵa qarsy shyqty.
Sherýge qatysýshylar «Áskerı shyǵyndardy qysqartyńdar, áleýmettik qamsyzdandyrýdy emes» jáne «ıAdrolyq oqtumsyqtardan góri medbıkeler qajet» degen jazýy bar plakattar ustady. Sonymen qatar olar qoljetimdi turǵyn úı men jańa mektepter salýdy qosa alǵanda, áleýmettik baǵdarlamalardy qarjylandyrý úshin aýqatty azamattarǵa salynatyn salyqty kóbeıtýdi talap etti.
Sherýdi Unison kásipodaǵy soǵysqa qarsy Stop the War uıymynyń, Ulybrıtanııanyń Sotsıalıstik jumysshy partııasynyń jáne ıAdrolyq qarýsyzdaný naýqany uıymynyń qoldaýymen uıymdastyrdy. Aktsııaǵa shamamen 2 myń adam qatysty.
Kásipodaqtar men soǵysqa qarsy qozǵalystardyń belsendilerinen bólek, London ımperııalyq kolledji men London ýnıversıtettik kolledjin qosa alǵanda, jetekshi joǵary oqý oryndarynyń stýdentteri men oqytýshylary da óz uıymdarynyń rámizderimen sherýge shyqty.
Uıymdastyrýshylardyń aıtýynsha, olardy Frantsııadaǵy narazylyq aktsııalary shabyttandyrǵan. Osylaısha, London mılıtarızatsııany kúsheıtý úshin áleýmettik shyǵyndardy qysqartýǵa qarsy aktsııalar ótken Eýropanyń taǵy bir qalasyna aınaldy.
Aıta keteıik, buǵan deıin Ulybrıtanııa 20 jyldan keıin iri kalıbrli qarý-jaraq óndirisin qaıta bastaǵany habarǵandy.
