Londonda Tramptyń saparyna qarsy jappaı narazylyq sharasy ótedi
ASTANA. KAZINFORM – Ulybrıtanııa astanasynda myńdaǵan adam AQSh prezıdentiniń memlekettik saparyna narazylyq bildirý úshin kóshege shyǵýǵa daıyndalyp jatyr, dep habarlaıdy Kazinform menshikti tilshisi.
Donald Tramp Ulybrıtanııaǵa seısenbi kúni keshke áıeli Melanııamen birge keldi. Sapardyń úsh kúndik baǵdarlamasyna korol III Charlzben jáne premer-mınıstr Kır Starmermen kezdesýler kiredi.
Sársenbide monarh amerıkalyq saıasatkerdi Vındzor saraıynda qabyldaıdy, al kelesi kúni kelissóz premer-mınıstrdiń Chekers rezıdentsııasynda jalǵasady. Kún tártibinde saýda máseleleri, HHІ ǵasyrdaǵy ozyq tehnologııalar, atom energetıkasyn damytý, Ýkraına men Gaza sektoryndaǵy jaǵdaı máseleleri bar.
Tramp Londonnyń ortalyǵyndaǵy Daýnıng-strıttegi premer-mınıstrdiń rezıdentsııasyna barmasa da, birqatar kásipodaqtar, qaıyrymdylyq uıymdar jáne qoǵamdyq birlestikterdi biriktiretin «Trampty toqtatyńyz» (Stop Trump) koalıtsııasy Ulybrıtanııa astanasynyń ortalyq kóshelerinde sherý ótkizýdi josparlap otyr.
Uıymdastyrýshylar úkimettiń adam quqyǵyn buzdy jáne ásire ońshyl ıdeıalardy qoldady dep aıyptalyp otyrǵan adamǵa qurmet kórsetý sheshimine narazylyq bildirmek. Saıasatkerler, sonyń ishinde burynǵy leıborısttik kóshbasshy Djeremı Korbın men Jasyldar partııasynyń jetekshisi Zak Polanskı qatysady dep josparlanyp otyr.
London polıtsııasy aýqymdy operatsııa daıyndap jatyr. Qala ortalyǵyna 1600-den astam qyzmetker jiberiledi, onyń 500-i basqa óńirlerden keledi. Quqyq qorǵaýshylardyń málimetinshe, sársenbidegi narazylyq sharasyna 50-ge jýyq túrli qozǵalys qatysýy múmkin.
The Guardian habarlaýynsha, narazylyq bildirýshiler Vındzor saraıynyń mańynda Donald Tramp pen sottalǵan seksýaldyq qylmysker Djeffrı Epshteınniń sýreti bar úlken banner ilip, keıinirek olardyń birneshe sýretin qamal munaralarynyń birine proektsııalaǵan. Polıtsııa tórt adamdy qamaýǵa aldy.
Aıta keteıik, 2018 jyly Donald Tramptyń saparyna qarsy narazylyq aktsııasyna uıymdastyrýshylardyń málimetinshe, Ulybrıtanııa astanasynda 250 myńǵa jýyq adam jınalǵan.