Londonda sheteldikter qazaq tilin úırenip júr
Londonda sheteldikter qazaq tilin úırenip jatyr. Olardyń ulttyq dástúrlerimizge degen qyzyǵýshylyǵy da erekshe, dep habarlaıdy Kazinform tilshisi.
Qazaqstannyń elshiligine jınalǵan názikjandy qaýym — Londondaǵy sheteldik dıplomattardyń áıelderi.
Islandııa, Katar, Pákistan, Malaızııa jáne basqa da memleket ókilderi uly Abaı tilin úırengisi keledi. Sózdik qory 2,5 mıllıon sózden turatyn qazaq tilin bir mezette meńgerý múmkin emes ekendigin olar moıyndaıdy. Biraq alǵashqy qadamdaryn jasap úlgerdi.
«Sálemetsiz be? Qalaısyz? Men jaqsymyn. Búgin osyndaı qazaq sózderin úırendim. Sálemdesýden bólek muǵalimnen qazaqtyń ulttyq taǵamdary qalaı atalatynyn bildim», — deıdi Pákistannyń Ulybrıtanııadaǵy elshisiniń jubaıy Sara Naım.
Muǵalimniń esimi — Káýsar Ǵalymjanqyzy. Jasy 11-de. Qarshadaı qyz ata-anasynyń qyzmet babymen Londonda ýaqytsha turyp jatyr.
Oqýdan qoly qalt etkende sheteldikterge qazaq tilin úıretedi. Ústinde ulttyq kıim, basynda sáýkele, qos burymynyń túbinde shashbaý. Sabaqtaryn ánmen árlep, bımen kórkemdeıdi.
Budan bólek sheteldikterge qazaq mádenıetiniń ajyramas bóligi sháı ishý rásimi kórsetildi. Kelin obrazyndaǵy elshilik qyzmetkeri sháıdi qalaı demdeýden bastap, qandaı kólemde quıý kerektigi týraly aqparat berdi.
Dastarhanda ulttyq taǵamdardyń túr-túri tur. Qurt, irimshik, tary, jentti buryn-sońdy jep kórmegen qonaqtar dámine dán rıza.
«Sháı quıý rásimi óte qyzyq ótti, men úshin úlken jańalyq boldy. Mádenıetterińiz óte baı eken. Búgin shaǵyn bir bóligi ǵana kórsetildi dep oılaımyn», - deıdi Malaızııanyń Joǵary komıssarynyń jubaıy Nor Aını Abdýl Rahman.
«Ulttyq qundylyqtaryńyz týraly bilip, rýhanı sýsyndadyq. Abysyndardyń tatýlyǵy, jańadan kelin túskende beriletin sháı — bári-bári biz úshin qyzyq boldy. Sháı quıǵanda keselerdi shatastyryp almaý da úlken óner dep bilemin», — deıdi Katardyń Ulybrıtanııadaǵy elshisiniń jubaıy Raıa Álhalıfa.
Shara barysynda qazaq áıelderiniń otbasyndaǵy ǵana emes qoǵamdaǵy róli týraly da aıtyldy. Memleket genderlik teńdikti saqtaýǵa, áıelder quqyǵyn qorǵaýǵa jáne otbasy qundylyqtaryn nyǵaıtýǵa árdaıym basa mán beredi, dedi uıymdastyrýshylar.
«Qazirgi qazaq áıeliniń beınesi óz oshaǵynyń berekesin keltirip, joldasyn súıip, balalaryn tárbıeleýmen qatar belgili bir salada jumys atqaryp, qoǵamyna paıda ákeletin tulǵa retinde kórinedi. Biz sol týraly aıtqymyz keldi», — deıdi Qazaqstannyń Ulybrıtanııadaǵy elshisiniń jubaıy Aqmaral Aıdarbekova.
Shara elshiliktegi názikjandy qyzmetkerlerdiń kúshimen ótkizildi.
Dastarhandy da jaıdy, kontserttik baǵdarlamany da ózderi uıymdastyrdy. Mýzykalyq aspaptarda oınap, án saldy, myń burala bı bıledi.
