Londonda saılaý qalaı ótti
Elshilik janyndaǵy № 244 saılaý ýchaskesinde Qazaqstan Respýblıkasy Prezıdentiniń saılaýyna daýys berý London ýaqytymen 07:00-den 20:00-ge deıin ótkizildi.
Óz eliniń bolashaǵyn aıqyndaýǵa umtyla otyryp, QR azamattary Londonǵa Birikken Koroldiktiń túkpir-túkpirinen, ıaǵnı Edınbýrg, Manchester, Aberdın, Glazgo jáne basqa qalalardan jol júrip keldi.
Londonda daýys bergen alǵashqy saılaýshy Bornmýt ýnıversıtetiniń stýdenti Bekzat Yrza boldy. Oǵan týǵan elinen ákelingen estelik kádesyılar tabys etildi.
«Búgingi saılaý elimizdiń bedelin, berekesin arttyrady dep oılaımyn. Jáne osyndaı asa mańyzdy sharadan jastar tys qalmaýy kerek dep, Londonǵa arnaıylap keldim», - dedi B.Yrza.
Londondaǵy saılaý ýchaskesinde tanymal aýyr atlet Ilıa Ilın de daýys berdi. Jaqynda ol Koventrı qalasynda ótken aýyr atletıkadan «British International Open 2019» halyqaralyq týrnırine qatysyp, kúmis júldege ıe boldy.
Saılaý ýchaskesiniń jumysyna «Erkindik qanaty» qoǵamdyq qorynyń baıqaýshysy da qatysty. Baıqaýshyǵa saılaý ýchaskesinde bolyp, saılaý ótkizý barysyn kedergisiz baqylaý múmkindigi qamtamasyz etildi. Qoǵamdyq uıymnyń ókili jáshikterdiń bútindigin tekserip, bıýlletenderdi sanaýdan bastap, saılaý komıssııasynyń hattamasyn jasap, qol qoıǵanǵa deıingi búkil saılaý protsesin baıqap otyrdy.
«Elshilik qyzmetkerleri ashyq jáne ádil saılaý ótkizýdi, saılaý ýchaskesiniń úzdiksiz jumys isteýin, sondaı-aq QR azamattarynyń qaýipsizdigin qamtamasyz etý úshin barlyq kúsh-jigerin jumsady. Elshilik qonaqtardy jyly qarsy alyp, olarǵa baýyrsaq, jent, irimshik jáne qurt sekildi ulttyq taǵamdar men otandyq kondıterlerdiń ónimderin usyndy», delingen habarlamada.
