Londonda Pıkasso, Klımt jáne Modılıanı kartınalary 270 mln dollarǵa aýktsıonǵa shyqty
ASTANA. KAZINFORM — Londonda Eýropadaǵy eń qundy jeke óner toptamalarynyń biriniń kórmesi ashyldy. Sotheby’s aýktsıon úıi brıtandyq mıllıarder jáne «Tottenhem Hotspýr» fýtbol klýbynyń burynǵy ıesi Djo Lıýıs otbasynyń kollektsııasyndaǵy týyndylardy usyndy. Jıyntyq quny 270 mıllıon dollardan asady, dep habarlaıdy Euronews.
Kórmege XX ǵasyrdyń iri sheberleri jasaǵan 48 óner týyndysy qoıylǵan. Olardyń qatarynda Amedeo Modılıanı, Gýstav Klımt, Pablo Pıkasso, Edgar Dega jáne Lıýsen Freıd bar.
Sotheby’s málimetinshe, bul — Eýropada bir adamǵa tıesili bolyp, aýktsıonǵa shyǵarylǵan eń qymbat baǵalanǵan óner kollektsııasy.
Eń basty lot — Amedeo Modılıanıdiń 1917 jyly salynǵan Nu assis au collier kartınasy. Sarapshylar bul týyndy 61 mıllıon dollardan astam somaǵa satylýy múmkin dep boljaıdy. Kartına 1995 jyldan beri alǵash ret saýdaǵa shyǵarylyp otyr.
Bul týyndyǵa erekshe qyzyǵýshylyq onyń tarıhynan týyndaıdy. Bul Modılıanıdiń Parıjde tiri kezindegi jalǵyz jeke kórmesiniń bóligi boldy. Aýktsıon úıiniń dereginshe, sol kórme qoǵamda úlken rezonans týdyryp, ashylǵannan keıin kóp uzamaı polıtsııa tarapynan jabylǵan.
Eń qundy jumystardyń qataryna Gýstav Klımttiń Portrait of Gertrud Loew atty portreti (27–41 mln dollar), Edgar Deganyń Petite danseuse de quatorze ans qola músini, sondaı-aq Pablo Pıkassonyń Buste de femme kartınasy kiredi. Bul týyndy onyń mýzasy Dora Maarǵa arnalǵan.
Sarapshylar erekshe nazardy Lıýsen Freıdtiń Sleeping by the Lion Carpet kartınasyna da aýdarady. Sotheby’s Eýropalyq bóliminiń tóraǵasy Olıver Barker bul jumysty naryqta paıda bolǵan eń úzdik kartınalardyń biri dep atady.
89 jastaǵy Djo Lıýıstiń baılyǵy shamamen 7,8 mıllıard dollarǵa baǵalanady. Ol uzaq jyldar boıy «Tottenhem Hotspýr» klýbyna ıelik etip, Eýropadaǵy eń iri jeke óner kollektsııalarynyń birin jınaǵan.
Kórme Londondaǵy Sotheby’s keńsesinde 23 maýsymǵa deıin tegin kórsetiledi.
Eske sala keteıik, Peleniń 1958 jylǵy álem chempıonatynyń fınalynda kıgen fýtbolkasy 6 mln dollarǵa satylady.
