Londonda «Ortalyq Azııa - Ulybrıtanııa» birinshi kezdesýi ótti
ASTANA. KAZINFORM – Búgin Londonda «Ortalyq Azııa - Ulybrıtanııa» formatynda Syrtqy ister mınıstrleri deńgeıindegi birinshi kezdesý ótti.
Jalpy otyrysty ashqan brıtan syrtqy saıasat vedomstvosynyń basshysy Ivett Kýper mundaı kezdesýdiń ózi Ortalyq Azııamen qarym-qatynastyń basymdyǵyn bildiretinin erekshe atap ótti.
- Biz jahandyq ahýal jyldam ózgerip jatqanyn túsinemiz jáne bul barlyq elge, ekonomıkalarymyzǵa, qoǵamdastyqtarymyz ben qaýipsizdigimizge áserin tıgizedi. Munyń ózindik táýekelderi bolǵanymen eger biz birlese áreket etetin bolsaq, onda múmkindikter de ashady, - dedi Kýper.
Onyń aıtýynsha, ekonomıkalyq ósim, turaqtylyq, ózara baılanys pen qaýipsizdik talqylaý barysynda basty nazarda boldy.
- Ortalyq Azııa elderimen yntymaqtastyq bolashaqtaǵy seriktestigimizdi damytý úshin aıtarlyqtaı perspektıva ashatyndyǵyna senimimiz mol, - dedi ol.
Kópjaqty kelissózderden bólek ekijaqty kelissózder de ótti.
Qazaqstan Syrtqy ister mınıstri Ermek Kósherbaevpen ótken kezdesý barysynda taraptar saýda-ekonomıkalyq baılanystardy keńeıtý, ınvestıtsııa tartý jáne ósimdi yntalandyrý úshin qosymsha qadamdar jasaý týraly ýaǵdalasty.
- Ortalyq Azııa – ekonomıkalyq ósimdi jedeldetý úshin zor áleýeti bar mańyzdy óńir. Kelisim jasasý brıtandyq bıznes úshin jańa múmkindikterdi qamtamasyz etip, ekonomıkalyq qaýipsizdikti nyǵaıtady jáne Birikken Koroldiktiń Ortalyq Azııa memleketteriniń táýelsizdigin qoldaýǵa beıildiligin pash etedi, - dep atap ótedi Ivett Kýper.
Ulybrıtanııanyń Qazaqstandaǵy elshisi Sallı Aksýorsı Astana men London ekonomıkalyq yntymaqtastyqty kezeń-kezeńmen keńeıtýge nıetti ekenin basa aıtty.
Onyń baǵalaýynsha, ekijaqty saýda-sattyqtyń qazirgi qarqyny munan arǵy ósim úshin turaqty baza qalyptastyryp, jańa jobalardy iske qosady.
- Kompanııalarymyz bir-birimen munan da kóp yntymaqtastyqty jolǵa qoıǵanyn qalaımyz. Biz Qazaqstanda mol múmkindikter bar dep esepteımiz. Qazaqstan – álemdegi óte qarqyndy damyp kele jatqan ekonomıkalardyń biri, maqsaty órshil el. Osyǵan oraı kóptegen brıtandyq kompanııa osy iske atsalysqanyn barynsha qalaımyz, - dedi elshi Aksýorsı.
Aıta keteıik, Qazaqstan Respýblıkasynyń Syrtqy ister mınıstri Ermek Kósherbaev Londonǵa jumys sapary aıasynda brıtan bıznes-qoǵamdastyǵy ókilderimen dóńgelek ústelge qatysty.
Іs-shara aıasynda Qazaqstan men Ulybrıtanııa arasyndaǵy strategııalyq seriktestik jol kartasy bekitildi.
Dóńgelek ústel qatysýshylary Qazaqstan men Ulybrıtanııa arasyndaǵy saýda-ekonomıkalyq jáne ınvestıtsııalyq seriktestikti keńeıtý perspektıvalaryn talqylady. Mańyzdy mıneraldar men sırek jer metaldar salasyndaǵy yntymaqtastyqqa erekshe nazar aýdardy.
Budan bólek, Qazaqstandaǵy brıtandyq bilim berý mekemeleriniń qatysýyn keńeıtý, onyń ishinde Almaty qalasynda «Charterhouse School» mektebin ashý, «Cardiff University» jasandy ıntellekt ortalyǵyn iske qosý, sondaı-aq Aqtóbe qalasynda «Heriot-Watt University» jańa kampýsyn ashý týraly kelisim boldy.