Londonda «Órmekshi adamǵa» úkim shyǵaryldy
ASTANA. QazAqparat - «Órmekshi adam» degen laqap atpen belgili frantsııalyq Alen Rober Ulybrıtanııa astanasyndaǵy záýlim ǵımarattyń birine shyqqany úshin 20 aptaǵa bas bostandyǵynan aıyryldy, dep habarlaıdy Habar 24 telearnasy. Mundaı sheshimdi London soty shyǵardy.
Sot tóraǵasynyń aıtýynsha, Roberdiń áreketi tájirıbesiz adamdardy osyndaı áreketke barýǵa ıtermelep, onyń saldary aýyr bolýy múmkin. Sondyqtan sot oǵan 5 jarym myń fýnt sterlıng aıyppul salyp, Ulybrıtanııadaǵy qandaı da bolsyn ǵımaratqa órmeleýge tyıym saldy.
Al «órmekshi adam» bul joly Londondaǵy 230 metrlik Salesforce Tower dep atalatyn bıik ǵımarattyń ústine ádettegideı saqtandyrýshy arqansyz órmelep shyqty.
Aıta keteıik, Alen Rober álemde 130-dan astam ǵımaratty baǵyndarǵan. Olardyń ishinde dúnıejúzindegi eń bıik ǵımarat - Dýbaıdaǵy Býrdj-Halıfa munarasy da bar.
