Londonda Muhtar Ábilıazovtyń isi boıynsha negizgi tyńdaýlar bastalady
ASTANA. 7 qarasha. QazAqparat - Búgin Brıtanııa astanasynda BTA Banktiń shaǵymy boıynsha 6 mıllıardtan astam dollardy zańsyz ıelengen banktiń dırektorlar keńesiniń burynǵy basshysy Muhtar Ábilıazovtyń negizgi tyńdaýlary bolady.
Bul týraly RIA habarlap otyr.
Londonnyń Joǵarǵy soty búgin Ábilıazovqa emes, onyń sybaılastaryna qatysty epızodtardy qarastyrmaq. Sotqa bank basshylyǵynyń burynǵy orynbasary Jaqsylyq Jarymbetov jáne BTA Banktiń Máskeýdegi ókildiginiń basshysy Ildar Hajaev, sondaı-aq bankırlerdiń aqshalary ótkizilip otyrdy dep kúdiktelgen kıprlik Usarel kompanııasynyń jaýapkerleri qatysady.
Jýyrda Anglııanyń Apellıatsııalyq soty Muhtar Ábilıazovty 22 aıǵa túrmege jabý týraly 2012 jyldyń 16 aqpanyndaǵy sheshimdi óz kúshinde qaldyrǵan bolatyn. Degenmen, bul sheshim ázirshe tek qaǵaz júzinde ǵana «iske asyp» jatyr, al bankırdiń qaıda ekeni áli kúnge beımálim.
Ábilıazov Ulybrıtanııadan qashyp shyǵyp, eýropanyń bir elinde jasyrynyp júr degen boljam da joq emes.
Bul bıznesmen 2009 jyly ústinen is qozǵalyp, BTA Bank memleket qaramaǵyna ótken soń, Qazaqstannan qashyp ketken edi. Ábilıazov Ulybrıtanııadan saıası baspana tapqan bolatyn. Qazir Qazaqstan bankırdi iri mólsherdegi alaıaqtyq jáne qosalqy kompanııalardy paıdalanyp bank qarajatyn shetelge asyrdy degen aıyppen ony ekstradıtsııalaýdy talap etýde. Reseıde de Ábilıazovqa qarsy qylmystyq is qozǵaldy.
