Londonda mıtıng kezinde 90-nan astam adamǵa tártiptik shara qoldanyldy

ASTANA. KAZINFORM — London polıtsııasy Palestine Action uıymyn qoldaǵan keminde 90 adamdy ustady, dep habarlaıdy Anadoly.

London ortalyǵynda polıtsııa Palestine Action uıymyn qoldaǵan keminde 90 adamdy quryqtady. Bul uıymdy Ulybrıtanııa bıligi shilde aıynda resmı túrde tyıym salynǵan dep tanyǵan edi.

Mıtıng Tavıstok skverinde ótti. Jınalǵandar Palestine Action uıymyn zańsyz dep jarııalaǵan sheshimge qarsy óz narazylyǵyn bildirdi. Uıym Izraılmen áriptestik jasaıtyn kompanııalarǵa qarsy «tikeleı áreket» ádisterimen tanymal.

Aktsııaǵa qatysýshylar karton paraqtaryna «Men genotsıdke qarsymyn — Palestine Action uıymyn qoldaımyn» degen urandar jazdy. Sodan keıin júzdegen adam alańnyń ortasyna otyryp, óz talaptaryna nazar aýdartqysy keldi.

London polıtsııasy (Metropolitan Police) qoldarynda osyndaı jazýlar ustap turǵan barlyq adamdardy tyıym salynǵan uıymdy qoldaǵan dep baǵalap ustady. Keıbir qatysýshylar polıtsııa talabyna baǵynbady, suraqtarǵa jaýap bermedi jáne aktsııa ornynan ketýden bas tartty.

Keminde 90 adam ustaldy

Narazylyq aktsııasy aıaqtalǵannan keıin polıtsııa óziniń X áleýmettik jelisindegi akkaýntynda keminde 90 adamnyń ustalǵanyn habarlady. Habarlamada aktsııa aıaqtalǵany jáne alań tolyq bosatylǵany aıtyldy.

Palestine Action Ulybrıtanııada tanymal boldy, óıtkeni olardyń aktsııalary nátıjesinde Izraıldiń áskerı-ónerkásiptik keshenimen baılanysy bar kásiporyndardyń óndirisi nemese jumysy uzaq ýaqytqa toqtatyldy.

Eń eleýli aktsııalardyń biri osy jyldyń maýsymynda Brız-Norton áskerı-áýe bazasynda ótti: belsendiler qorshaýdy kesip ótip, ushý alańyna kirip, áskerı ushaqtardyń qozǵaltqyshtaryn qyzyl boıaýmen boıap, palestına týyn qaldyryp ketti.

Sol aktsııadan keıin sol kezdegi Іshki ister mınıstri Ivett Kýper topty tyıym salynǵan dep tanytý protsedýrasyn bastaǵan. Shilde aıynda tıisti sheshim resmı túrde kúshine endi.

Sodan beri belsendiler men quqyq qorǵaýshylar tyıym salýdy joıý úshin sot arqyly kúres júrgizip jatyr. Sol ýaqytta Defend Our Juries koalıtsııasy Palestine Action uıymyn qoldaýǵa arnalǵan birqatar aktsııa uıymdastyryp, el boıynsha myńdaǵan adam ustalǵan.

Budan buryn Italııada Izraıl komandasyn basketbol matchyna qarsy aktsııamen qarsy alǵanyn jazǵanbyz.