Londonda medıa keńseni órtemek bolǵan kúdikpen úsh adam ustaldy
ASTANA. KAZINFORM – London qalasynyń soltústik-batysynda parsy tilinde habar taratatyn medıa uıym keńsesin órtemek bolǵan kúdikpen úsh adam ustaldy, dep habarlaıdy Kazinform tilshisi.
Polıtsııa málimetinshe, oqıǵa 15 sáýirdiń keshinde Ýemblı aýdanynda bolǵan. Saǵat 20:30 shamasynda patrýl qyzmetkerleri ǵımaratqa qaraı janǵysh zat laqtyrylǵanyn baıqaǵan. Ol avtoturaq aýmaǵyna túsip, kóp uzamaı ózdiginen sóngen. Oqıǵa saldarynan zardap shekkender joq, materıaldyq shyǵyn keltirilmegen.
Jedel izdestirý sharalary barysynda kúdiktilerdiń oqıǵa ornynan qara tústi jol talǵamaıtyn kólikpen qashyp ketkeni anyqtaldy. Kóp uzamaı sıpattamaǵa sáıkes keletin kólik polıtsııa tarapynan tabylǵan. Júrgizýshi toqtaý týraly talapty elemegennen keıin, qýý bastalǵan.
Keıin kólik jol-kólik oqıǵasyna ushyraǵan. Oqıǵa ornynda úsh kúdikti – 16 jastaǵy jasóspirim jáne 19 ben 21 jastaǵy eki er adam ustaldy. Olardyń barlyǵy adam ómirine qaýip tóndirýi múmkin órt qoıý áreketine kúdikpen qamaýǵa alynyp, polıtsııa bólimine jetkizilgen.
Qaýipsizdik maqsatynda jaqyn mańdaǵy birneshe ǵımarat ýaqytsha evakýatsııalanǵan. Keıin polıtsııa turǵyndar úshin qaýip joq ekenin rastady.
Quqyq qorǵaý organdary bul oqıǵany terrorıstik akt retinde qarastyrmaı otyrǵanyn málimdedi. Degenmen tergeýdi Londonnyń terrorızmge qarsy bólimshesi jergilikti polıtsııamen birlesip júrgizip jatyr.
Aıta keteıik, Londonda evreı qaıyrymdylyq uıymyna tıesili 4 jedel járdem kóligin órtep ketti.
