Londonda mas kúıinde kólik júrgizgen QR Elshiliginiń qyzmetkeri jumystan bosatylǵan
ASTANA. QazAqparat - Brıtanııa basylymdary osy eldegi Qazaqstan elshiliginiń qyzmetkeri mas kúıinde kólik júrgizdi degen aqparat taratqan bolatyn.
Búgin Syrtqy ister mınıstrligi baspasóz qyzmetiniń jetekshisi Ánýar Jaınaqov ol azamat Elshilik qyzmetkeri ekenin, biraq, dıplomat emes, tehnıkalyq qyzmetker bolǵanyn aıtyp berdi.
«Ol Elshilik qyzmetkeri. Biraq, tehnıkalyq qyzmetkeri. Ondaı fakt bolǵan. Osy fakt anyqtalaǵnnan keıin tehnıkalyq qyzmetker birden elge qaıta shaqyryldy. Qazirgi tańda ol azamat Ulybrıtanııadaǵy Qazaqstan elshiliginde jumys istemeıdi», - dedi Á.Jaınaqov.
«Osy jerde basa aıta keterligimiz, Qazaqstan Respýblıkasynyń Syrtqy ister mınıstrligi men Qazaqstannyń ózge memleketterdegi dıplomatııalyq mekemeleri kez kelgen tártip buzýshylyqqa «múlde tózbeý» saıasatyn ustanady», - dep tolyqtyrdy Á.Jaınaqov.
