Londonda lastanǵan aýadan jylyna 9,5 myń adam ómirimen qosh aıtysady
ASTANA. QazAqparat - Londonda jyl saıyn lastanǵan tútindi aýadan 9,5 myń adam ómirimen qosh aıtysady, dep habarlaıdy Bı-Bı-Sı agenttigi.
Qalanyń kólikti baqylaý qyzmeti tapsyrysymen zertteý júrgizgen Koroleva kolledjiniń mamandary osyndaı qorytyndy shyǵaryp otyr. Ǵalymdar Brıtanııa astanasyndaǵy ýly aýanyń quramynda ýltradısperstik tozań jáne azottyń qos totyǵy (NO2) basym dep sanaıdy.
London aýasyndaǵy azottyń qos totyǵynyń kóptigi sonshalyq sońǵy bes jylda belgilengen eýropalyq normatıvterden asyp ketken.
2015 jyly normatıvtegi NO2 lımıti jyldyń alǵashqy 4 kúninde bitip qalǵan. Qala aýasynyń qanshalyqty lastanǵanyn osydan ǵana kórýge bolady. Ýly zattyń 80 paıyzy aýaǵa kólikter taratady eken.
Bir qyzyǵy, 1956 jyly Ulybrıtanııada «Taza aýa týraly» zań qabyldanǵan, onda zalaldy otyndy jaǵýǵa tyıym salynǵan. Óıtkeni osydan 4 jyl buryn 1952 jyly brıtanııa astanasyn ýly tútin basyp, 12 myń adam kóz jumǵan. Antıtsıklon saldarynan tútin qala ústinen ketpeı jaıylyp, qala 5 kún boıy ýly «bulttyń» zardabyn tartqan.
Eldiń úkimeti osy oqıǵadan keıin arnaıy zań qabyldap, qalanyń keı aýdandarynda kamın peshterine tyıym salyp, aýany tazartý boıynsha keshendi sharalardy qolǵa aldy.
