Londonda Qazaqstannyń ınvestıtsııalyq áleýeti tanystyryldy
ASTANA. KAZINFORM – QR Ulttyq ekonomıka vıtse-mınıstri Asan Darbaev 2025 jylǵy 5 qarashada Londonda ótken Kazakhstan Capital Markets Day 2025 halyqaralyq konferentsııasyna qatysty. Іs-shara Qazaqstannyń ekonomıkalyq ósýi men qarjy sektoryn damytý perspektıvasyn talqylaýdyń mańyzdy alańyna aınaldy.
Konferentsııa sheńberinde Asan Darbaev «Ornyqty ekonomıkalyq ósý jáne qarjy sektoryn damytý» taqyrybynda paneldik sessııada sóz sóıledi.
Asan Darbaev óz sózinde uıymdastyrýshylarǵa shaqyrǵany úshin alǵysyn bildirip, ornyqty damý jáne onyń qaǵıdattaryn ulttyq jáne óńirlik kapıtal naryǵy strategııasyna ıntegratsııalaý máselelerin talqylaýdyń mańyzdylyǵyn atap ótti. Ol pikirtalas tájirıbe almasýdyń jáne Qazaqstan men óńirdiń qarjy sektoryn damytýdyń birlesken tásilin ázirleý úshin tıimdi alań bolatynyna senim bildirdi.
Vıtse-mınıstrdiń aıtýynsha, 2025 jylǵy qańtar-qyrkúıek qorytyndysy boıynsha Qazaqstannyń JІÓ-niń naqty ósýi 6,3%. Bul sońǵy jyldardaǵy eń úzdik kórsetkishtiń biri. Orta merzimdi maqsat — 2029 jylǵa qaraı JІÓ-niń 450 mıllıard AQSh dollaryna jetý.
Qazaqstan ınvestıtsııalyq belsendilikti yntalandyrý jáne ulttyq ekonomıkanyń tıimdiligin arttyrý sharalaryn iske asyrýdy jalǵastyrýda. Kólik-logıstıkalyq ınfraqurylymdy damytýǵa jáne eldiń Eýrazııanyń jetekshi tranzıttik jáne ınvestıtsııalyq haby retindegi rólin nyǵaıtýǵa basymdyq beriledi. Búgingi tańda strategııalyq mańyzy bar Orta dálizdi qosa alǵanda, 5 halyqaralyq temirjol jáne 8 avtomobıl dálizi iske qosylǵan.
Qazaqstan senimdi jáne kredıtke qabiletti áriptes mártebesin rastaýda. Elimiz basty halyqaralyq S& P, Fitch jáne Moody’s sekildi jetekshi halyqaralyq agenttikterdiń ınvestıtsııalyq deńgeıi reıtıngine ıe. Bul rette S& P agenttigi jaqynda reıtıng boıynsha boljamdy «Pozıtıvti» deńgeıge kóterdi, al Moody’s ótken jyly reıtıngti Baa1-ge kóterdi.
Qazaqstanda ınvestıtsııalyq ahýaldy qalyptastyrý ashyqtyq pen turaqtylyq qaǵıdattaryna negizdelgen. Investorlar úshin qoldaýdyń túrli nysandary kózdelgen-ınvestıtsııalyq kelisimsharttar, salyqtyq jáne kedendik preferentsııalar, sondaı-aq 25 jylǵa deıingi merzimge zańnamanyń turaqtylyǵyna kepildik. Investorlarmen ózara is-qımyl «biryńǵaı tereze"qaǵıdaty boıynsha áreket etetin tsıfrlyq ınvestıtsııalyq platforma arqyly qamtamasyz etiledi.
Ákimshilik rásimderdi jeńildetetin jáne jobalardy iske asyrýdy jedeldetetin Investıtsııa tartý jónindegi keńes (Investıtsııalyq shtab) mańyzdy ról atqarady. Investıtsııalyq ekojúıeniń mańyzdy elementi aǵylshyn quqyǵynyń ıýrısdıktsııasy negizinde jumys isteıtin jáne qatysýshylardyń ashyqtyǵy men quqyǵyn qorǵaýdyń joǵary standartyn usynatyn «Astana» halyqaralyq qarjy ortalyǵy bolyp qala beredi. Qazirgi ýaqytta AHQO-da 80-nen astam elden 3500-den astam kompanııa tirkelgen. Olardyń jalpy ınvestıtsııa kólemi 14 mlrd AQSh dollarynan asady.
Qazaqstan halyqaralyq bıznes úshin tartymdy alań bolyp qala beredi. Elimizdiń negizgi áriptesteriniń qataryna Chevron, ExxonMobil, Shell, GE Transportation, Hyundai, KIA, Coca-Cola, Danone, Carlsberg, Lactalis jáne t. b. qosa alǵanda, munaı-gaz, mashına jasaý, kólik jáne tamaq salasyndaǵy kompanııalar kiredi.
Konferentsııa barysynda vıtse-mınıstr japondyq Mitsubishi UFJ Financial Group (MUFG) bank jáne qarjy holdınginiń ókilderimen, sondaı-aq Morgan Stanley Investment Management (MSIM) ókilimen kezdesýler ótkizdi.
Aıta keteıik, shveıtsarııalyq kompanııa Qazaqstannyń agroónerkásip keshenine $700 mln-nan astam ınvestıtsııa salmaq.