Londonda qazaqstandyq elektrondyq oqýlyqtardyń TopIQ platformasy tanystyryldy

ASTANA. QazAqparat - Elektrondyq oqýlyqtardyń TopIQ qazaqstandyq platformasy búkilálemdik baıqaýda úzdik dep tanylyp, ekinshi oryndy ıelengen bolatyn. Startap joba mektepke aýyr sómke tasymaı, kitapta bar búkil aqparatty onlaın kórýge kómektesedi. Ideıa avtorlary Londonda ótken Bilim berý tehnologııalarynyń halyqaralyq mamandandyrylǵan kórmesine qatysyp, tusaýkeserin ótkizdi, dep habarlaıdy QazAqparat tilshisi.

Bett Show – 35 myńnan astam oqytýshy men bilim salasynyń mamandaryn biriktiretin dúnıejúzilik kórme. Jınalǵandar jańa tehnologııalarmen jáne ınnovatsııalarmen tanysyp, ózekti máselelerdiń sheshimin izdeıdi. Sharada alǵashqy qazaqstandyq platforma TopIQ elektrondyq oqýlyǵynyń tusaýy kesildi.

«Halyqaralyq arenaǵa otandyq ónimimizben shyqqanymyzǵa qýanyshtymyz. Budan da joǵary belesterdi baǵyndyryp, Qazaqstandy jaqsy qyrynan tanyta beremiz degen úmittemiz», deıdi startap jobany shyǵarǵan «Almatykitap baspasynyń» ókili Anelıa Batalova.

TopIQ elektrondy oqýlyqtary Qazaqstanda tıimdiligin dáleldep úlgerdi. Ásirese, pandemııa kezinde. Oqýshylar, muǵalimder jáne ata-analar platformany qoldaný óte qolaıly dep tapty. Otandyq startap jobany sheteldik sarapshylar da quptap otyr.

«Usynǵan ónimderine qarap, jetistikke jetýge tolyq múmkindikteri bar der edim», deıdi ızraıldik IT sarapshy Amı Moıal.

«Menińshe, joba cózsiz tabysty bolady. Óıtkeni ol zaman talabyna jaýap beredi», deıdi polshalyq IT sarapshy Mırotslav Sızdyn.

Baspa ókilderin Qazaqstannyń Ulybrıtanııadaǵy elshisi Maǵjan Іlııasov qabyldap, álemdik naryqqa baǵyt alǵan jobaǵa sáttilik tiledi. Qonaqtar elshilik kitaphanasyna jańadan shyqqan tól ónimin tartý etti.