Londonda qazaqstandyq-brıtandyq iskerlik keńestiń ekinshi otyrysy ótti
ASTANA. QazAqparat - Londonda qazaqstandyq-brıtandyq Úkimetaralyq saýda-ekonomıkalyq, ǵylymı-tehnıkalyq jáne mádenı komıssııanyń tórtinshi jáne qazaqstandyq-brıtandyq iskerlik keńestiń ekinshi otyrysy bolyp ótti, dep habarlaıdy QazAqparat.
Qazaqstandyq delegatsııany QR Investıtsııalar jáne damý mınıstri Jeńis Qasymbek bastap bardy. Forýmda, sonymen birge, memlekettik jáne ortalyq organdardyń, «Kazakh Invest» UQ» AQ ókilderi men otandyq kásipkerler qatysty. Forým alańynda brıtandyq taraptan saıası jáne qoǵam qaıratkerleri, dıplomattar men sarapshylar, klapandardyń keń aýqymdaǵy spektrin óndiretin Severn Glocon Group, munaı jáne energetıkalyq sektor turǵysynda jumys júrgizetin Borkit SG JV, sonymen qatar Metalysis, Intellisense.io, UK Export Finance sekildi iri kompanııalardyń jetekshileri boldy.
QR Investıtsııalar jáne damý mınıstri Jeńis Qasymbek óz sózinde Ulybrıtanııa men Soltústik Irlandııanyń Birikken Koroldiginiń Úkimetine jáne qazaqstandyq-brıtandyq iskerlik keńesin ótkizý arqyly, eki eldi iskerlik turǵyda jaqyndastyra túsken «Samuryq-Qazyna» AQ-ǵa alǵysyn bildirdi.
Jeńis Qasymbek 2016 jyly ekonomıkany ártaraptandyrý baǵytynda aýqymdy jumystar júrgizilgenin atap ótti. Ótken jyly ken óndirý 2,9% artyp, 28,3 mln.tonnaǵa jetken. Qurysh óndirý 9,2% artyp, 4,3 mln.tonnadan assa, hımııalyq ónerkásip 22% ósip, onyń óndirisinen túsken túsim 3,1 mln AQSh dollaryna jetken.
2017 jyly qazaqstandyq-brıtandyq seriktestiktiń oń dınamıkasy baıqalyp otyr. Naqtyraq aıtqanda, 9 aıda Qazaqstannyń Ulybrıtanııaǵa eksporty 8,2% artyp, 720 mln. AQSh dollarlyq kórsetkishti kórsetken.
Qazirgi tańda Qazaqstan Birlesken Koroldiktiń qala tehnologııasy, onyń ishinde OpenBIM standarttaryn qurý tájirıbesine qyzyǵýda. Brıtan mamandary jumysy BIM standartyna kóshirilip, 6D jáne 7D dárejesine jetkizgen. Osynyń arqasynda ulybrıtanııalyqtar jobanyń júzege asý merzimin aıtarlyqtaı qysqartyp, qurylystyń qunyn tómendetýge, smetalyq qujatty ázirleý ýaqytyn qysqartýǵa jáne qurylys tsıklyn tsıfrlandyrýǵa qol jetkizilip otyr.
