Londonda Qazaqstandaǵy parlamenttik saılaý taqyrybynda jıyn ótti

LONDON. QazAqparat – Qazaqstannyń Ulybrıtanııadaǵy Elshisi Erlan Ydyrysov alda ótetin QR Parlamenti Májilisiniń saılaýyna qatysty brıfıng ótkizdi. Oǵan saıası jáne bıznes-ısteblıshment, sondaı-aq brıtanııalyq jáne halyqaralyq buqaralyq aqparat quraldarynyń ókilderi shaqyryldy, dep habarlaıdy QazAqparat tilshisi.

Іs-shara «gıbrıdti» formatta uıymdastyryldy, ıaǵnı qonaqtar betpe-bet jáne onlaın formatta suraq qoıýǵa múmkindik aldy. Brıfıngke qatysýshylarǵa táýelsiz Qazaqstannyń saıası damý tarıhy, elimizde júrgizilip jatqan demokratııalyq reformalar, sondaı-aq saılaýǵa daıyndyq barysy týraly málimet berildi.

Qonaqtarǵa saılaýdyń negizgi kezeńderi, saılaý protsesi jáne Qazaqstannyń zańnamasy, saılaýǵa qatysatyn partııalar, halyqaralyq baqylaýshylar men sheteldik baspasóz ókilderin akkredıtteý, sondaı-aq COVID-19 pandemııasyna baılanysty saılaý protsesine qatysýshylardyń densaýlyǵy men qaýipsizdigin qamtamasyz etý jónindegi sharalar týraly ózekti aqparat usynyldy.

«Táýelsizdik alǵan sátten bastap Qazaqstan demokratııalyq, erkin jáne ashyq qoǵam qurý baǵytyn tańdap aldy. Erkin jáne ádil saılaý elimizdiń Konstıtýtsııasynda bekitilgen Qazaqstannyń memlekettik bıligin uıymdastyrýdyń negizgi qaǵıdaty. Aldaǵy saılaýda el basshylyǵynyń Qazaqstannyń saıası damýyndaǵy ilgerilemeli progress baǵytyna beıildiligi taǵy da rastalady dep senemin», - dedi Erlan Ydyrysov.

QR Elshisi Qazaqstanda saıası reformalardyń aýqymdy baǵdarlamasy belsendi júzege asyrylyp jatqanyn, onyń mańyzdy mindetteriniń biri saılaýdy eń joǵary halyqaralyq standarttarǵa sáıkes ótkizý ekendigin atap ótti.

«Osy maqsatta, atap aıtqanda, saıası partııalardy tirkeý shegi 40-tan 20 myń adamǵa deıin tómendetildi, saıası partııalardan kandıdattar tiziminde áıelder men jastar úshin 30 paıyzdyq kvotany qamtamasyz etý úshin zańnamaǵa ózgerister engizildi. Jıyn bostandyǵyn qamtamasyz etetin zańnama da lıberaldy reformalarǵa ushyrady», - dedi óz sózinde Erlan Ydyrysov.

Brıfıng qonaqtary saılaý protsesiniń joǵary standarttaryn qamtamasyz etý ınstıtýttary týraly, sondaı-aq Ulybrıtanııadaǵy QR Elshiligi janyndaǵy saılaý ýchaskesinde saılaýdy ótkizýdiń erejeleri týraly suraqtarǵa jaýap ala aldy.