Londonda Qazaqstan armııasynyń bitimgershilik mıssııasy talqylandy

LONDON. QazAqparat – Ulybrıtanııa Lordtar jáne Qaýymdar palatalarynyń músheleri Qazaqstannyń áskerı reformalary men bitimgershilik qyzmetin talqylady. QR Táýelsizdiginiń 30 jyldyǵy qarsańynda uıymdastyrylǵan vebınarǵa, sondaı-aq QR Ulybrıtanııadaǵy Elshisi Erlan Ydyrysov jáne QR Qorǵanys mınıstrliginiń ókilderi qatysty, dep habarlaıdy QazAqparat tilshisi.

«Búginde qazaqstandyq Qarýly Kúshter qurylymy jaǵynan, kadrlar daıarlaý jáne jaraqtandyrý boıynsha jańǵyrtylyp transformatsııalandy. Biz Qazaqstannyń halyqaralyq bitimgershilikti iske qosqan úlesin joǵary baǵalaımyz. Qazaqstan burynǵy Keńes Odaǵynyń aýmaǵynda qurylǵan eń iri bitimgershilik kúshterdiń biri», – dedi Ulybrıtanııa Lordtar palatasynyń múshesi Lord Djon Astor.

Ulybrıtanııa Parlamenti Qaýymdar palatasynyń depýtaty, Qazaqstanmen yntymaqtastyq jónindegi jalpypartııalyq parlamenttik toptyń tóraǵasy polkovnık Bob Stıýart Qazaqstannyń Birikken Ulttar Uıymynyń bitimgershilik operatsııalaryna, sonyń ishinde Lıvan, Shyǵys Sahara jáne Iraktaǵy mıssııalarǵa qatysýynyń joǵary mańyzdylyǵyn atap ótti. Ol sondaı-aq qos el bitimgerleriniń BUU mıssııalaryna birlese qatysý múmkindikterin qarastyrý qajettigin aıtty.

QR Qorǵanys mınıstrligi Halyqaralyq yntymaqtastyq departamentiniń basshysy polkovnık Oljas Qusaıynov Qarýly Kúshterdi jańǵyrtýdyń negizgi kezeńderi týraly aıtyp berdi. «Osy ýaqyt ishinde Qazaqstan bastapqyda eń iri ıadrolyq derjavalardyń biri bolǵanymen, keıin joıqyn kúshti jahandyq deńgeıde taratpaý salasynda kóshbasshy elge jáne beıbitshilikti qoldaý jónindegi birlesken is-qımyldardyń belsendi qatysýshysyna aınaldy», – dedi ol.

QR Qorǵanys mınıstrligi Bitimgerlik daıarlyq ortalyǵynyń basshysy polkovnık Baýyrjan Nyǵmatýllın Qazaqstannyń BUU aıasyndaǵy bitimgershilik mıssııalarǵa qosqan úlesi týraly, sondaı-aq bitimgershilik qyzmetke qatysý geografııasyn keńeıtý úshin qazaqstandyq áskerı-saıası basshylyqtyń jasap jatqan jumystary týraly egjeı-tegjeıli aıtyp berdi. Máselen, 1993-jyldan bastap, Qazaqstan Tájik-Aýǵan shekarasynda, Irakta, Nepalda, Grýzııada, Kot-D’Ivýarda, Shyǵys Saharada jáne Lıvanda ótken halyqaralyq operatsııalarǵa qatysyp keledi.

«BUU talaptaryna sáıkes, Qazaqstan bitimgershilik qyzmette genderlik teńdikke qol jetkizý úshin de dáıekti qadamdar jasap jatyr. Qazaqstannyń tórt áıel ofıtseri BUU bitimgershilik operatsııalaryna qatysyp úlgerdi. Al olardyń biri qazirgi ýaqytta Batys Saharada qyzmet etedi», – dep atap ótti B.Nyǵmatýllın.

Ortalyq basshysy sondaı-aq brıtanııalyq taraptyń kómegimen júzege asyp jatqan «Bitimgerlerge arnalǵan aǵylshyn tili» jobasyna da toqtaldy. Búgingi tańda qazaqstandyq áskerı qyzmetshiler tildik daǵdylaryn damytyp jatyr.

Baıandamalardan keıin suraq-jaýap sessııasy ótti. Vebınar – QR Ulybrıtanııadaǵy Elshiligi jáne Brıtan-Qazaqstan qoǵamy uıymdastyrǵan Qazaqstan Táýelsizdiginiń 30 jyldyǵyna arnalǵan «Kazakhstan at 30» is-sharalar serııasynyń besinshi bóligi.