Londonda qazaq kúresinen bolashaqtyq stýdentter arasynda «Bolashaq Barysy» týrnıri ótti

ASTANA. QazAqparat - 1 qarasha kúni London qalasynda "Bolashaq" baǵdarlamasymen Anglııada oqıtyn stýdentter arasynda qazaq kúresinen ótken "Bolashaq Barysy" týrnıri óz máresine jetti. Bul týraly «Qazaq Barysy» qorynyń baspasóz qyzmetinen habarlandy.

Qazaq Handyǵynyń 550 jyldyq mereıtoıyna oraılastyrylǵan týrnırdi «Qazaqstan Barysy» qazaq kúresin damytý qory men «QazAlıans» qaýymdastyǵy uıymdastyrǵan bolatyn. Londonda ótken týrnırde 74 keliden joǵary salmaq dárejesinde barlyǵy 16 balýan qatysty. Olardyń arasynda Aıdar Qoıshybaev 1-oryn, Asqar Sharapatov 2-oryn, Dáýren Dýberbaev 3-orynǵa ıe boldy. «Bolashaq Barysy» týrnırinde halyqaralyq dárejedegi tóreshi Nurlybek Ermaǵambetov pen ulttyq dárejedegi tóreshi Erlan Estek tórelik etti.

«Táýelsizdik alǵan jyldardan beri qaraı qazaq kúresi qaryshtap damyp keledi. Sońǵy bes jyl ishinde ulttyq kúres jańa sıpatta órkendeı túskenin erekshe ataýǵa bolady. Respýblıkalyq «Qazaqstan Barysy», halyqaralyq «Eýrazııa Barysy», búkilálemdik «Álem Barysy» sekildi jobalar sonyń dáleli. Osy arqyly qazaq kúresine jurttyń erekshe yqylasy aýyp, súıispenshiligine bólendi. «Bolashaq Barysy» týrnıri osyndaı tyń jobalardyń jalǵasy bolyp otyr», - delingen baspasóz baıanynda.