Londonda qazaq halqynyń tynys-tirshiligi men mádenıetin tanytatyn kórme ótip jatyr
Londonda qazaqstandyq sýretshiler Gúlnur Muqajanova men Aıǵana Ǵalıdyń jeke kórmesi ótip jatyr. Olar tól týyndylary arqyly sheteldik kórermenge Uly dala eli men kóshpendilerdiń fılosofııasyn jetkizýdi maqsat etip otyr, dep habarlaıdy QazAqparat tilshisi.
Gúlnur Muqajanova óz eńbekterinde negizinen kıiz jáne mata paıdalanady. «Bosaǵa» dep atalatyn dúnıesi sol materıaldardan jasalǵan. «Bosaǵany attama, bosaǵada turma» degen uǵymdar Gúlnur úshin qasıetti. Qazaq halqymen ǵasyrlar boıy jasasyp kele jatqan yrym-tyıymdardy ol osy kartınasy arqyly jetkizgisi kelgen. Taǵy bir tań qaldyrǵan týyndysy maldyń terisinen jasalǵan adam denesiniń músini. Júrek tusynda shanshylyp turǵa ıneler myń ólip, myń tirilgen qazaq halqynyń qaıǵy-qasireti dep túsindiredi ol.
«Kóshpendiler ýaqytynda ata-babalarymyz qanshama qıyndyqtardan ótken osy kúnge deıin. Bizge qaldyrǵan salt-dástúr, bizdiń mádenıetimiz bar. Meniń negizgi maqsatym qazaqtyń árýaqtarynyń rýhyn kórsetý, saqtaý, álem halqyna jetkizý, qurmetteý», deıdi sýretshi Gúlnur Muqajanova.
Bul Gúlnurdyń Londondaǵy úshinshi kórmesi. Ózi Berlınde turady. 10 jyldan astam ýaqyttan beri óz óner týyndylary arqyly Germanııada týǵan jerin tanytyp júr. Taǵy bir talantty otandasymyz Aıǵana Ǵalıdiń de aıtary bar. Shetelge jıi shyǵatyn sýretshi bul joly «Táńir» serııasyna kiretin kartınalaryn ákelgen. Ómirdiń qalaı bastaý alyp, jalǵasatynyn jetkizýge tyrysqan.
«Men úshin mádenıetimizdi tanytý óte mańyzdy. Meniń oıymsha, bizdiń eshkimge uqsamaıtyn mentalıtetimiz bar jáne ony barshaǵa túsinikti tilmen, óner tilimen jetkizý qajet-aq», - deıdi sýretshi Aıǵana Ǵalı.
Ortalyq Azııa ókilderiniń óner týyndylaryn tamashalaý brıtan jurtshylyǵy úshin árdaıym qyzyqty. Biraq qazaqstandyqtardyń kórmeleri Londonda jıi ótpeıdi. Jahandaný jaǵdaıynda ulttyq biregeılikti saqtaýǵa septigi tıetin sharaǵa kelgen sheteldik kórermender biraz rýhanı baıyp qaldyq deıdi.
«Sýretshiler óte talantty jáne olar halyqaralyq deńgeıde tanylýlary kerek. Menińshe, Eýropa halqy Qazaqstannyń zamanaýı óneri týraly ázirge bile bermeıdi. Al mundaı galereıalar óte qajet nasıhat quraly», deıdi kórermenderdiń biri Aleksıs de Tızengaýzen.
Qazaqstandyq avtorlardyń eńbekterimen tanys óner janashyrlary jeke toptamalaryn tolyqtyrý úshin olardyń kartınalary men músinderin jıi satyp alady eken.
«Al bul bizdi yntalandyryp, ári qaraı eńbektenýge shabyt beredi», deıdi daryn ıeleri. Kórme 15-shi qazanǵa deıin jalǵaspaq.
