Londonda qaýipti tropıkalyq masa kóbeıe bastady
ASTANA. KAZINFORM - Ulybrıtanııa astanasynda tropıkalyq ınfektsııalardyń vırýstaryn tasymaldaýy múmkin sary bezgek masasynyń (Aedes aegypti) kóbeıgeni anyqtaldy, dep habarlaıdy Kazinform agenttiginiń Londondaǵy menshikti tilshisi.
Brıtan astanasynyń shyǵys bóligindegi turǵyn úıler aýmaǵynda masalar men olardyń dernásilderi anyqtaldy. Sońǵy jyldary sary bezgek masasy Ulybrıtanııada tórtinshi ret tirkelip otyr. Alaıda mamandar onyń el aýmaǵynda alǵash ret kóbeıgenin anyqtady.
Jándikter anyqtalǵannan keıin Ulybrıtanııanyń Densaýlyq qaýipsizdigi agenttiginiń mamandary dernásilderdi joıý úshin aýmaqty óńdep, aýdanǵa baqylaýdy kúsheıtti. Olar mańaıda basqa da oshaqtardyń bar-joǵyn anyqtaý úshin masalardy aýlap jatyr. Qajet bolǵan jaǵdaıda olardy joıady.
Sary bezgek masasy denge, chıkýngýnıa jáne Zıka sııaqty birneshe qaýipti vırýstyq ınfektsııany tasymaldaýy múmkin. Sonymen qatar Ulybrıtanııanyń Densaýlyq qaýipsizdigi agenttigi bul jaǵdaıda halyqqa tónetin qaýip óte tómen ekenin atap ótti. Anyqtalǵan jándikterden adamdarǵa ınfektsııa juqqanyna eshqandaı dálel joq. Sondaı-aq ázirge jaqyn mańdaǵy qoǵamdyq oryndardan masalar nemese olardyń dernásilderi tabylǵan joq.
Brıtandyq mamandardyń baǵalaýynsha, jándikter elge kezdeısoq ákelingen bolýy múmkin. Masalar kólikpen jáne basqa da kólik quraldarymen, bagajben, sondaı-aq ımporttalatyn ósimdiktermen birge taralýy yqtımal.
Qazirgi ýaqytta sary bezgek masasy Ulybrıtanııada turaqty mekendeıtin túrge jatpaıdy. Eldiń klımaty, ádette, onyń uzaq ýaqyt tirshilik etýi úshin tym sýyq. Alaıda mamandar klımattyń ózgerýi ınvazııalyq masa túrleriniń elge jıi enýine yqpal etip, olardyń Ulybrıtanııa aýmaǵynda tirshilik etý yqtımaldyǵyn arttyrýy múmkin ekenin eskertedi.
Buǵan deıin DDU Kongo Demokratııalyq Respýblıkasyndaǵy jaǵdaıǵa baılanysty Ebola indetiniń taralý qaýpi týraly eskertken bolatyn.
